Mandala.Sukta 1.100

वार्षागिराः ऋज्रा श्वाऽम्बरीष-सहदेव-भयमान-सुराधसः। इन्द्रः। त्रिष्टुप्। · vārṣāgirāḥ ṛjrā śvā'mbarīṣa-sahadeva-bhayamāna-surādhasaḥ | indraḥ | triṣṭup |

स यो वृषा॒ वृष्ण्ये॑भि॒: समो॑का म॒हो दि॒वः पृ॑थि॒व्याश्च॑ स॒म्राट् ।स॒ती॒नस॑त्वा॒ हव्यो॒ भरे॑षु म॒रुत्वा॑न् नो भव॒त्विन्द्र॑ ऊ॒ती॥

sa yo vṛṣā vṛṣṇyebhi: samokā maho divaḥ pṛthivyāśca samrāṭ |satīnasatvā havyo bhareṣu marutvān no bhavatvindra ūtī ||

यस्याना॑प्त॒: सूर्य॑स्येव॒ यामो॒ भरे॑भरे वृत्र॒हा शुष्मो॒ अस्ति॑ ।वृष॑न्तम॒: सखि॑भि॒: स्वेभि॒रेवै॑र्म॒रुत्वा॑न् नो भव॒त्विन्द्र॑ ऊ॒ती॥

yasyānāpta: sūryasyeva yāmo bharebhare vṛtrahā śuṣmo asti |vṛṣantama: sakhibhi: svebhirevairmarutvān no bhavatvindra ūtī ||

दि॒वो न यस्य॒ रेत॑सो॒ दुघा॑ना॒: पन्था॑सो॒ यन्ति॒ शव॒साप॑रीताः ।त॒रद्द्वे॑षाः सास॒हिः पौंस्ये॑भिर्म॒रुत्वा॑न् नो भव॒त्विन्द्र॑ ऊ॒ती॥

divo na yasya retaso dughānā: panthāso yanti śavasāparītāḥ |taraddveṣāḥ sāsahiḥ pauṃsyebhirmarutvān no bhavatvindra ūtī ||

सो अङ्गि॑रोभि॒रङ्गि॑रस्तमो भू॒द् वृषा॒ वृष॑भि॒: सखि॑भि॒: सखा॒ सन् ।ऋ॒ग्मिभि॑र्ऋग्मी गा॒तुभि॒र्ज्येष्ठो॑ म॒रुत्वा॑न् नो भव॒त्विन्द्र॑ ऊ॒ती॥

so aṅgirobhiraṅgirastamo bhūd vṛṣā vṛṣabhi: sakhibhi: sakhā san |ṛgmibhirṛgmī gātubhirjyeṣṭho marutvān no bhavatvindra ūtī ||

स सू॒नुभि॒र्न रु॒द्रेभि॒र्ऋभ्वा॑ नृ॒षाह्ये॑ सास॒ह्वाँ अ॒मित्रा॑न् ।सनी॑ळेभिः श्रव॒स्या॑नि॒ तूर्व॑न् म॒रुत्वा॑न् नो भव॒त्विन्द्र॑ ऊ॒ती॥

sa sūnubhirna rudrebhirṛbhvā nṛṣāhye sāsahvām̐ amitrān |sanīḷebhiḥ śravasyāni tūrvan marutvān no bhavatvindra ūtī ||

स म॑न्यु॒मीः स॒मद॑नस्य क॒र्ता ऽस्माके॑भि॒र्नृभि॒: सूर्यं॑ सनत् ।अ॒स्मिन्नह॒न्त्सत्प॑तिः पुरुहू॒तो म॒रुत्वा॑न् नो भव॒त्विन्द्र॑ ऊ॒ती॥

sa manyumīḥ samadanasya kartā 'smākebhirnṛbhi: sūryaṃ sanat |asminnahantsatpatiḥ puruhūto marutvān no bhavatvindra ūtī ||

तमू॒तयो॑ रणय॒ञ्छूर॑सातौ॒ तं क्षेम॑स्य क्षि॒तय॑: कृण्वत॒ त्राम् ।स विश्व॑स्य क॒रुण॑स्येश॒ एको॑ म॒रुत्वा॑न् नो भव॒त्विन्द्र॑ ऊ॒ती॥

tamūtayo raṇayañchūrasātau taṃ kṣemasya kṣitaya: kṛṇvata trām |sa viśvasya karuṇasyeśa eko marutvān no bhavatvindra ūtī ||

तम॑प्सन्त॒ शव॑स उत्स॒वेषु॒ नरो॒ नर॒मव॑से॒ तं धना॑य ।सो अ॒न्धे चि॒त् तम॑सि॒ ज्योति॑र्विदन् म॒रुत्वा॑न् नो भव॒त्विन्द्र॑ ऊ॒ती॥

tamapsanta śavasa utsaveṣu naro naramavase taṃ dhanāya |so andhe cit tamasi jyotirvidan marutvān no bhavatvindra ūtī ||

स स॒व्येन॑ यमति॒ व्राध॑तश्चि॒त् स द॑क्षि॒णे संगृ॑भीता कृ॒तानि॑ ।स की॒रिणा॑ चि॒त् सनि॑ता॒ धना॑नि म॒रुत्वा॑न् नो भव॒त्विन्द्र॑ ऊ॒ती॥

sa savyena yamati vrādhataścit sa dakṣiṇe saṃgṛbhītā kṛtāni |sa kīriṇā cit sanitā dhanāni marutvān no bhavatvindra ūtī ||

स ग्रामे॑भि॒: सनि॑ता॒ स रथे॑भिर्वि॒दे विश्वा॑भिः कृ॒ष्टिभि॒र्न्व१द्य ।स पौंस्ये॑भिरभि॒भूरश॑स्तीर्म॒रुत्वा॑न् नो भव॒त्विन्द्र॑ ऊ॒ती॥

sa grāmebhi: sanitā sa rathebhirvide viśvābhiḥ kṛṣṭibhirnva1dya |sa pauṃsyebhirabhibhūraśastīrmarutvān no bhavatvindra ūtī ||

स जा॒मिभि॒र्यत् स॒मजा॑ति मी॒ह्ले ऽजा॑मिभिर्वा पुरुहू॒त एवै॑: ।अ॒पां तो॒कस्य॒ तन॑यस्य जे॒षे म॒रुत्वा॑न् नो भव॒त्विन्द्र॑ ऊ॒ती ॥स व॑ज्र॒भृद् द॑स्यु॒हा भी॒म उ॒ग्रः स॒हस्र॑चेताः श॒तनी॑थ॒ ऋभ्वा॑ ।च॒म्री॒षो न शव॑सा॒ पाञ्च॑जन्यो म॒रुत्वा॑न् नो भव॒त्विन्द्र॑ ऊ॒ती॥

sa jāmibhiryat samajāti mīhle 'jāmibhirvā puruhūta evai: |apāṃ tokasya tanayasya jeṣe marutvān no bhavatvindra ūtī ||sa vajrabhṛd dasyuhā bhīma ugraḥ sahasracetāḥ śatanītha ṛbhvā |camrīṣo na śavasā pāñcajanyo marutvān no bhavatvindra ūtī ||

तस्य॒ वज्र॑: क्रन्दति॒ स्मत् स्व॒र्षा दि॒वो न त्वे॒षो र॒वथ॒: शिमी॑वान् ।तं स॑चन्ते स॒नय॒स्तं धना॑नि म॒रुत्वा॑न् नो भव॒त्विन्द्र॑ ऊ॒ती॥

tasya vajra: krandati smat svarṣā divo na tveṣo ravatha: śimīvān |taṃ sacante sanayastaṃ dhanāni marutvān no bhavatvindra ūtī ||

यस्याज॑स्रं॒ शव॑सा॒ मान॑मु॒क्थं प॑रिभु॒जद् रोद॑सी वि॒श्वत॑: सीम् ।स पा॑रिष॒त् क्रतु॑भिर्मन्दसा॒नो म॒रुत्वा॑न् नो भव॒त्विन्द्र॑ ऊ॒ती॥

yasyājasraṃ śavasā mānamukthaṃ paribhujad rodasī viśvata: sīm |sa pāriṣat kratubhirmandasāno marutvān no bhavatvindra ūtī ||

न यस्य॑ दे॒वा दे॒वता॒ न मर्ता॒ आप॑श्च॒न शव॑सो॒ अन्त॑मा॒पुः ।स प्र॒रिक्वा॒ त्वक्ष॑सा॒ क्ष्मो दि॒वश्च॑ म॒रुत्वा॑न् नो भव॒त्विन्द्र॑ ऊ॒ती॥

na yasya devā devatā na martā āpaścana śavaso antamāpuḥ |sa prarikvā tvakṣasā kṣmo divaśca marutvān no bhavatvindra ūtī ||

रो॒हिच्छ्या॒वा सु॒मदं॑शुर्लला॒मीर्द्यु॒क्षा रा॒य ऋ॒ज्राश्व॑स्य ।वृष॑ण्वन्तं॒ बिभ्र॑ती धू॒र्षु रथं॑ म॒न्द्रा चि॑केत॒ नाहु॑षीषु वि॒क्षु॥

rohicchyāvā sumadaṃśurlalāmīrdyukṣā rāya ṛjrāśvasya |vṛṣaṇvantaṃ bibhratī dhūrṣu rathaṃ mandrā ciketa nāhuṣīṣu vikṣu ||

ए॒तत् त्यत् त॑ इन्द्र॒ वृष्ण॑ उ॒क्थं वा॑र्षागि॒रा अ॒भि गृ॑णन्ति॒ राध॑: ।ऋ॒ज्राश्व॒: प्रष्टि॑भिरम्ब॒रीष॑: स॒हदे॑वो॒ भय॑मानः सु॒राधा॑:॥

etat tyat ta indra vṛṣṇa ukthaṃ vārṣāgirā abhi gṛṇanti rādha: |ṛjrāśva: praṣṭibhirambarīṣa: sahadevo bhayamānaḥ surādhā: ||

दस्यू॒ञ्छिम्यूँ॑श्च पुरुहू॒त एवै॑र्ह॒त्वा पृ॑थि॒व्यां शर्वा॒ नि ब॑र्हीत् ।सन॒त् क्षेत्रं॒ सखि॑भिः श्वि॒त्न्येभि॒: सन॒त् सूर्यं॒ सन॑द॒पः सु॒वज्र॑:॥

dasyūñchimyūm̐śca puruhūta evairhatvā pṛthivyāṃ śarvā ni barhīt |sanat kṣetraṃ sakhibhiḥ śvitnyebhi: sanat sūryaṃ sanadapaḥ suvajra: ||

वि॒श्वाहेन्द्रो॑ अधिव॒क्ता नो॑ अ॒स्त्वप॑रिह्वृताः सनुयाम॒ वाज॑म् ।तन्नो॑ मि॒त्रो वरु॑णो मामहन्ता॒मदि॑ति॒: सिन्धु॑: पृथि॒वी उ॒त द्यौः॥

viśvāhendro adhivaktā no astvaparihvṛtāḥ sanuyāma vājam |tanno mitro varuṇo māmahantāmaditi: sindhu: pṛthivī uta dyauḥ ||