Mandala.Sukta 1.120

कक्षीवान् दैर्घतमस औशिजः। अश्विनौ। (१२ दुःस्वप्ननाशनम्) ।१ गायत्री, २ ककुप्, ३ का- विराट्, ४ नष्टरूपी, ५ तनुशिरा, ६ उष्णिक्, ७ विष्टार-बृहती, ८ कृतिः, ९ विराट्, १०-१२ गायत्री। · kakṣīvān dairghatamasa auśijaḥ | aśvinau | (12 duḥsvapnanāśanam) |1 gāyatrī, 2 kakup, 3 kā- virāṭ, 4 naṣṭarūpī, 5 tanuśirā, 6 uṣṇik, 7 viṣṭāra-bṛhatī, 8 kṛtiḥ, 9 virāṭ, 10-12 gāyatrī |

का रा॑ध॒द्धोत्रा॑श्विना वां॒ को वां॒ जोष॑ उ॒भयो॑: ।क॒था वि॑धा॒त्यप्र॑चेताः॥

kā rādhaddhotrāśvinā vāṃ ko vāṃ joṣa ubhayo: |kathā vidhātyapracetāḥ ||

वि॒द्वांसा॒विद् दुर॑: पृच्छे॒दवि॑द्वानि॒त्थाप॑रो अचे॒ताः ।नू चि॒न्नु मर्ते॒ अक्रौ॑॥

vidvāṃsāvid dura: pṛcchedavidvānitthāparo acetāḥ |nū cinnu marte akrau ||

ता वि॒द्वांसा॑ हवामहे वां॒ ता नो॑ वि॒द्वांसा॒ मन्म॑ वोचेतम॒द्य ।प्रार्च॒द् दय॑मानो यु॒वाकु॑:॥

tā vidvāṃsā havāmahe vāṃ tā no vidvāṃsā manma vocetamadya |prārcad dayamāno yuvāku: ||

वि पृ॑च्छामि पा॒क्या॒ ३ न दे॒वान् वष॑ट्कृतस्याद्भु॒तस्य॑ दस्रा ।पा॒तं च॒ सह्य॑सो यु॒वं च॒ रभ्य॑सो नः॥

vi pṛcchāmi pākyā 3 na devān vaṣaṭkṛtasyādbhutasya dasrā |pātaṃ ca sahyaso yuvaṃ ca rabhyaso naḥ ||

प्र या घोषे॒ भृग॑वाणे॒ न शोभे॒ यया॑ वा॒चा यज॑ति पज्रि॒यो वा॑म् ।प्रैष॒युर्न वि॒द्वान्॥

pra yā ghoṣe bhṛgavāṇe na śobhe yayā vācā yajati pajriyo vām |praiṣayurna vidvān ||

श्रु॒तं गा॑य॒त्रं तक॑वानस्या॒हं चि॒द्धि रि॒रेभा॑श्विना वाम् ।आक्षी शु॑भस्पती॒ दन्॥

śrutaṃ gāyatraṃ takavānasyāhaṃ ciddhi rirebhāśvinā vām |ākṣī śubhaspatī dan ||

यु॒वं ह्यास्तं॑ म॒हो रन् यु॒वं वा॒ यन्नि॒रत॑तंसतम् ।ता नो॑ वसू सुगो॒पा स्या॑तं पा॒तं नो॒ वृका॑दघा॒योः॥

yuvaṃ hyāstaṃ maho ran yuvaṃ vā yanniratataṃsatam |tā no vasū sugopā syātaṃ pātaṃ no vṛkādaghāyoḥ ||

मा कस्मै॑ धातम॒भ्य॑मि॒त्रिणे॑ नो॒ माकुत्रा॑ नो गृ॒हेभ्यो॑ धे॒नवो॑ गुः ।स्त॒ना॒भुजो॒ अशि॑श्वीः॥

mā kasmai dhātamabhyamitriṇe no mākutrā no gṛhebhyo dhenavo guḥ |stanābhujo aśiśvīḥ ||

दु॒ही॒यन् मि॒त्रधि॑तये यु॒वाकु॑ रा॒ये च॑ नो मिमी॒तं वाज॑वत्यै ।इ॒षे च॑ नो मिमीतं धेनु॒मत्यै॑॥

duhīyan mitradhitaye yuvāku rāye ca no mimītaṃ vājavatyai |iṣe ca no mimītaṃ dhenumatyai ||

अ॒श्विनो॑रसनं॒ रथ॑मन॒श्वं वा॒जिनी॑वतोः ।तेना॒हं भूरि॑ चाकन॥

aśvinorasanaṃ rathamanaśvaṃ vājinīvatoḥ |tenāhaṃ bhūri cākana ||

अ॒यं स॑मह मा तनू॒ह्याते॒ जनाँ॒ अनु॑ ।सो॒म॒पेयं॑ सु॒खो रथ॑:॥

ayaṃ samaha mā tanūhyāte janām̐ anu |somapeyaṃ sukho ratha: ||

अध॒ स्वप्न॑स्य॒ निर्वि॒दे ऽभु॑ञ्जतश्च रे॒वत॑: ।उ॒भा ता बस्रि॑ नश्यतः॥

adha svapnasya nirvide 'bhuñjataśca revata: |ubhā tā basri naśyataḥ ||