Mandala.Sukta 1.126

कक्षीवान् दैर्घतमस औशिजः। (६) स्वनयो भावयव्यः, (७) रोमशा। १-५ स्वनयो भावयव्यः, ६ रोमशा, ७ स्वनयो भावयव्यः। त्रिष्टुप्, ६-७ अनुष्टुप्। · kakṣīvān dairghatamasa auśijaḥ | (6) svanayo bhāvayavyaḥ, (7) romaśā | 1-5 svanayo bhāvayavyaḥ, 6 romaśā, 7 svanayo bhāvayavyaḥ | triṣṭup, 6-7 anuṣṭup |

अम॑न्दा॒न् त्स्तोमा॒न् प्र भ॑रे मनी॒षा सिन्धा॒वधि॑ क्षिय॒तो भा॒व्यस्य॑ ।यो मे॑ स॒हस्र॒ममि॑मीत स॒वान॒तूर्तो॒ राजा॒ श्रव॑ इ॒च्छमा॑नः॥

amandān tstomān pra bhare manīṣā sindhāvadhi kṣiyato bhāvyasya |yo me sahasramamimīta savānatūrto rājā śrava icchamānaḥ ||

श॒तं राज्ञो॒ नाध॑मानस्य नि॒ष्काञ् छ॒तमश्वा॒न् प्रय॑तान् त्स॒द्य आद॑म् ।श॒तं क॒क्षीवाँ॒ असु॑रस्य॒ गोनां॑ दि॒वि श्रवो॒ऽजर॒मा त॑तान॥

śataṃ rājño nādhamānasya niṣkāñ chatamaśvān prayatān tsadya ādam |śataṃ kakṣīvām̐ asurasya gonāṃ divi śravo'jaramā tatāna ||

उप॑ मा श्या॒वाः स्व॒नये॑न द॒त्ता व॒धूम॑न्तो॒ दश॒ रथा॑सो अस्थुः ।ष॒ष्टिः स॒हस्र॒मनु॒ गव्य॒मागा॒त् सन॑त् क॒क्षीवाँ॑ अभिपि॒त्वे अह्ना॑म्॥

upa mā śyāvāḥ svanayena dattā vadhūmanto daśa rathāso asthuḥ |ṣaṣṭiḥ sahasramanu gavyamāgāt sanat kakṣīvām̐ abhipitve ahnām ||

च॒त्वा॒रिं॒शद् दश॑रथस्य॒ शोणा॑: स॒हस्र॒स्याग्रे॒ श्रेणिं॑ नयन्ति ।म॒द॒च्युत॑: कृश॒नाव॑तो॒ अत्या॑न् क॒क्षीव॑न्त॒ उद॑मृक्षन्त प॒ज्राः॥

catvāriṃśad daśarathasya śoṇā: sahasrasyāgre śreṇiṃ nayanti |madacyuta: kṛśanāvato atyān kakṣīvanta udamṛkṣanta pajrāḥ ||

पूर्वा॒मनु॒ प्रय॑ति॒मा द॑दे व॒स्त्रीन् यु॒क्ताँ अ॒ष्टाव॒रिधा॑यसो॒ गाः ।सु॒बन्ध॑वो॒ ये वि॒श्या॑ इव॒ व्रा अन॑स्वन्त॒: श्रव॒ ऐष॑न्त प॒ज्राः॥

pūrvāmanu prayatimā dade vastrīn yuktām̐ aṣṭāvaridhāyaso gāḥ |subandhavo ye viśyā iva vrā anasvanta: śrava aiṣanta pajrāḥ ||

आग॑धिता॒ परि॑गधिता॒ या क॑शी॒केव॒ जङ्ग॑हे ।ददा॑ति॒ मह्यं॒ यादु॑री॒ याशू॑नां भो॒ज्या॑ श॒ता॥

āgadhitā parigadhitā yā kaśīkeva jaṅgahe |dadāti mahyaṃ yādurī yāśūnāṃ bhojyā śatā ||

उपो॑प मे॒ परा॑ मृश॒ मा मे॑ द॒भ्राणि॑ मन्यथाः ।सर्वा॒हम॑स्मि रोम॒शा ग॒न्धारी॑णामिवावि॒का॥

upopa me parā mṛśa mā me dabhrāṇi manyathāḥ |sarvāhamasmi romaśā gandhārīṇāmivāvikā ||