Mandala.Sukta 1.128

परुच्छेपो दैवोदासिः । अग्निः। अत्यष्टिः। · parucchepo daivodāsiḥ | agniḥ | atyaṣṭiḥ |

अ॒यं जा॑यत॒ मनु॑षो॒ धरी॑मणि॒ होता॒ यजि॑ष्ठ उ॒शिजा॒मनु॑ व्र॒तम॒ग्निः स्वमनु॑ व्र॒तम् ।वि॒श्वश्रु॑ष्टिः सखीय॒ते र॒यिरि॑व श्रवस्य॒ते ।अद॑ब्धो॒ होता॒ नि ष॑ददि॒ळस्प॒दे परि॑वीत इ॒ळस्प॒दे॥

ayaṃ jāyata manuṣo dharīmaṇi hotā yajiṣṭha uśijāmanu vratamagniḥ svamanu vratam |viśvaśruṣṭiḥ sakhīyate rayiriva śravasyate |adabdho hotā ni ṣadadiḷaspade parivīta iḷaspade ||

तं य॑ज्ञ॒साध॒मपि॑ वातयामस्यृ॒तस्य॑ प॒था नम॑सा ह॒विष्म॑ता दे॒वता॑ता ह॒विष्म॑ता ।स न॑ ऊ॒र्जामु॒पाभृ॑त्य॒या कृ॒पा न जू॑र्यति ।यं मा॑त॒रिश्वा॒ मन॑वे परा॒वतो॑ दे॒वं भाः प॑रा॒वत॑:॥

taṃ yajñasādhamapi vātayāmasyṛtasya pathā namasā haviṣmatā devatātā haviṣmatā |sa na ūrjāmupābhṛtyayā kṛpā na jūryati |yaṃ mātariśvā manave parāvato devaṃ bhāḥ parāvata: ||

एवे॑न स॒द्यः पर्ये॑ति॒ पार्थि॑वं मुहु॒र्गी रेतो॑ वृष॒भः कनि॑क्रद॒द् दध॒द् रेत॒: कनि॑क्रदत् ।श॒तं चक्षा॑णो अ॒क्षभि॑र्दे॒वो वने॑षु तु॒र्वणि॑: ।सदो॒ दधा॑न॒ उप॑रेषु॒ सानु॑ष्व॒ग्निः परे॑षु॒ सानु॑षु॥

evena sadyaḥ paryeti pārthivaṃ muhurgī reto vṛṣabhaḥ kanikradad dadhad reta: kanikradat |śataṃ cakṣāṇo akṣabhirdevo vaneṣu turvaṇi: |sado dadhāna upareṣu sānuṣvagniḥ pareṣu sānuṣu ||

स सु॒क्रतु॑: पु॒रोहि॑तो॒ दमे॑दमे॒ ऽग्निर्य॒ज्ञस्या॑ध्व॒रस्य॑ चेतति॒ क्रत्वा॑ य॒ज्ञस्य॑ चेतति ।क्रत्वा॑ वे॒धा इ॑षूय॒ते विश्वा॑ जा॒तानि॑ पस्पशे ।यतो॑ घृत॒श्रीरति॑थि॒रजा॑यत॒ वह्नि॑र्वे॒धा अजा॑यत॥

sa sukratu: purohito damedame 'gniryajñasyādhvarasya cetati kratvā yajñasya cetati |kratvā vedhā iṣūyate viśvā jātāni paspaśe |yato ghṛtaśrīratithirajāyata vahnirvedhā ajāyata ||

क्रत्वा॒ यद॑स्य॒ तवि॑षीषु पृ॒ञ्चते॒ ऽग्नेरवे॑ण म॒रुतां॒ न भो॒ज्ये॑षि॒राय॒ न भो॒ज्या॑ ।स हि ष्मा॒ दान॒मिन्व॑ति॒ वसू॑नां च म॒ज्मना॑ ।स न॑स्त्रासते दुरि॒ताद॑भि॒ह्रुत॒: शंसा॑द॒घाद॑भि॒ह्रुत॑:॥

kratvā yadasya taviṣīṣu pṛñcate 'gneraveṇa marutāṃ na bhojyeṣirāya na bhojyā |sa hi ṣmā dānaminvati vasūnāṃ ca majmanā |sa nastrāsate duritādabhihruta: śaṃsādaghādabhihruta: ||

विश्वो॒ विहा॑या अर॒तिर्वसु॑र्दधे॒ हस्ते॒ दक्षि॑णे त॒रणि॒र्न शि॑श्रथच्छ्रव॒स्यया॒ न शि॑श्रथत् ।विश्व॑स्मा॒ इदि॑षुध्य॒ते दे॑व॒त्रा ह॒व्यमोहि॑षे ।विश्व॑स्मा॒ इत् सु॒कृते॒ वार॑मृण्वत्य॒ग्निर्द्वारा॒ व्यृ॑ण्वति॥

viśvo vihāyā aratirvasurdadhe haste dakṣiṇe taraṇirna śiśrathacchravasyayā na śiśrathat |viśvasmā idiṣudhyate devatrā havyamohiṣe |viśvasmā it sukṛte vāramṛṇvatyagnirdvārā vyṛṇvati ||

स मानु॑षे वृ॒जने॒ शंत॑मो हि॒तो॒ ३ ऽग्निर्य॒ज्ञेषु॒ जेन्यो॒ न वि॒श्पति॑: प्रि॒यो य॒ज्ञेषु॑ वि॒श्पति॑: ।स ह॒व्या मानु॑षाणामि॒ळा कृ॒तानि॑ पत्यते ।स न॑स्त्रासते॒ वरु॑णस्य धू॒र्तेर्म॒हो दे॒वस्य॑ धू॒र्तेः॥

sa mānuṣe vṛjane śaṃtamo hito 3 'gniryajñeṣu jenyo na viśpati: priyo yajñeṣu viśpati: |sa havyā mānuṣāṇāmiḷā kṛtāni patyate |sa nastrāsate varuṇasya dhūrtermaho devasya dhūrteḥ ||

अ॒ग्निं होता॑रमीळते॒ वसु॑धितिं प्रि॒यं चेति॑ष्ठमर॒तिं न्ये॑रिरे हव्य॒वाहं॒ न्ये॑रिरे ।वि॒श्वायुं॑ वि॒श्ववे॑दसं॒ होता॑रं यज॒तं क॒विम् ।दे॒वासो॑ र॒ण्वमव॑से वसू॒यवो॑ गी॒र्भी र॒ण्वं व॑सू॒यव॑:॥

agniṃ hotāramīḷate vasudhitiṃ priyaṃ cetiṣṭhamaratiṃ nyerire havyavāhaṃ nyerire |viśvāyuṃ viśvavedasaṃ hotāraṃ yajataṃ kavim |devāso raṇvamavase vasūyavo gīrbhī raṇvaṃ vasūyava: ||