Mandala.Sukta 1.137

परुच्छेपो दैवोदासिः। मित्रावरुणौ।अतिशक्वरी। · parucchepo daivodāsiḥ | mitrāvaruṇau |atiśakvarī |

सु॒षु॒मा या॑त॒मद्रि॑भि॒र्गोश्री॑ता मत्स॒रा इ॒मे सोमा॑सो मत्स॒रा इ॒मे ।आ रा॑जाना दिविस्पृशा ऽस्म॒त्रा ग॑न्त॒मुप॑ नः ।इ॒मे वां॑ मित्रावरुणा॒ गवा॑शिर॒: सोमा॑: शु॒क्रा गवा॑शिरः॥

suṣumā yātamadribhirgośrītā matsarā ime somāso matsarā ime |ā rājānā divispṛśā 'smatrā gantamupa naḥ |ime vāṃ mitrāvaruṇā gavāśira: somā: śukrā gavāśiraḥ ||

इ॒म आ या॑त॒मिन्द॑व॒: सोमा॑सो॒ दध्या॑शिरः सु॒तासो॒ दध्या॑शिरः ।उ॒त वा॑मु॒षसो॑ बु॒धि सा॒कं सूर्य॑स्य र॒श्मिभि॑: ।सु॒तो मि॒त्राय॒ वरु॑णाय पी॒तये॒ चारु॑र्ऋ॒ताय॑ पी॒तये॑॥

ima ā yātamindava: somāso dadhyāśiraḥ sutāso dadhyāśiraḥ |uta vāmuṣaso budhi sākaṃ sūryasya raśmibhi: |suto mitrāya varuṇāya pītaye cārurṛtāya pītaye ||

तां वां॑ धे॒नुं न वा॑स॒रीमं॒शुं दु॑ह॒न्त्यद्रि॑भि॒: सोमं॑ दुह॒न्त्यद्रि॑भिः ।अ॒स्म॒त्रा ग॑न्त॒मुप॑ नो॒ऽर्वाञ्चा॒ सोम॑पीतये ।अ॒यं वां॑ मित्रावरुणा॒ नृभि॑: सु॒तः सोम॒ आ पी॒तये॑ सु॒तः॥

tāṃ vāṃ dhenuṃ na vāsarīmaṃśuṃ duhantyadribhi: somaṃ duhantyadribhiḥ |asmatrā gantamupa no'rvāñcā somapītaye |ayaṃ vāṃ mitrāvaruṇā nṛbhi: sutaḥ soma ā pītaye sutaḥ ||