Mandala.Sukta 1.149

दीर्घतमा औचथ्यः। अग्निः। विराट्। · dīrghatamā aucathyaḥ | agniḥ | virāṭ |

म॒हः स रा॒य एष॑ते॒ पति॒र्दन्नि॒न इ॒नस्य॒ वसु॑नः प॒द आ ।उप॒ ध्रज॑न्त॒मद्र॑यो वि॒धन्नित्॥

mahaḥ sa rāya eṣate patirdannina inasya vasunaḥ pada ā |upa dhrajantamadrayo vidhannit ||

स यो वृषा॑ न॒रां न रोद॑स्यो॒: श्रवो॑भि॒रस्ति॑ जी॒वपी॑तसर्गः ।प्र यः स॑स्रा॒णः शि॑श्री॒त योनौ॑॥

sa yo vṛṣā narāṃ na rodasyo: śravobhirasti jīvapītasargaḥ |pra yaḥ sasrāṇaḥ śiśrīta yonau ||

आ यः पुरं॒ नार्मि॑णी॒मदी॑दे॒दत्य॑: क॒विर्न॑भ॒न्यो॒ ३ नार्वा॑ ।सूरो॒ न रु॑रु॒क्वाञ्छ॒तात्मा॑॥

ā yaḥ puraṃ nārmiṇīmadīdedatya: kavirnabhanyo 3 nārvā |sūro na rurukvāñchatātmā ||

अ॒भि द्वि॒जन्मा॒ त्री रो॑च॒नानि॒ विश्वा॒ रजां॑सि शुशुचा॒नो अ॑स्थात् ।होता॒ यजि॑ष्ठो अ॒पां स॒धस्थ॑श॥

abhi dvijanmā trī rocanāni viśvā rajāṃsi śuśucāno asthāt |hotā yajiṣṭho apāṃ sadhasthaśa ||

अ॒यं स होता॒ यो द्वि॒जन्मा॒ विश्वा॑ द॒धे वार्या॑णि श्रव॒स्या ।मर्तो॒ यो अ॑स्मै सु॒तुको॑ द॒दाश॑॥

ayaṃ sa hotā yo dvijanmā viśvā dadhe vāryāṇi śravasyā |marto yo asmai sutuko dadāśa ||