Mandala.Sukta 1.170

(५) १,३,४ इन्द्रः, (४अगस्त्यो वा,) २,५ अगस्त्यो मैत्रावरुणिः । इन्द्रः। १बृहती, २-४ अनुष्टुप्, ५ त्रिष्टुप्। · (5) 1,3,4 indraḥ, (4agastyo vā,) 2,5 agastyo maitrāvaruṇiḥ | indraḥ | 1bṛhatī, 2-4 anuṣṭup, 5 triṣṭup |

न नू॒नमस्ति॒ नो श्वः कस्तद् वे॑द॒ यदद्भु॑तम् ।अ॒न्यस्य॑ चि॒त्तम॒भि सं॑च॒रेण्य॑मु॒ताधी॑तं॒ वि न॑श्यति॥

na nūnamasti no śvaḥ kastad veda yadadbhutam |anyasya cittamabhi saṃcareṇyamutādhītaṃ vi naśyati ||

किं न॑ इन्द्र जिघांससि॒ भ्रात॑रो म॒रुत॒स्तव॑ ।तेभि॑: कल्पस्व साधु॒या मा न॑: स॒मर॑णे वधीः॥

kiṃ na indra jighāṃsasi bhrātaro marutastava |tebhi: kalpasva sādhuyā mā na: samaraṇe vadhīḥ ||

किं नो॑ भ्रातरगस्त्य॒ सखा॒ सन्नति॑ मन्यसे ।वि॒द्मा हि ते॒ यथा॒ मनो॒ ऽस्मभ्य॒मिन्न दि॑त्ससि॥

kiṃ no bhrātaragastya sakhā sannati manyase |vidmā hi te yathā mano 'smabhyaminna ditsasi ||

अरं॑ कृण्वन्तु॒ वेदिं॒ सम॒ग्निमि॑न्धतां पु॒रः ।तत्रा॒मृत॑स्य॒ चेत॑नं य॒ज्ञं ते॑ तनवावहै॥

araṃ kṛṇvantu vediṃ samagnimindhatāṃ puraḥ |tatrāmṛtasya cetanaṃ yajñaṃ te tanavāvahai ||

त्वमी॑शिषे वसुपते॒ वसू॑नां॒ त्वं मि॒त्राणां॑ मित्रपते॒ धेष्ठ॑: ।इन्द्र॒ त्वं म॒रुद्भि॒: सं व॑द॒स्वाध॒ प्राशा॑न ऋतु॒था ह॒वींषि॑॥

tvamīśiṣe vasupate vasūnāṃ tvaṃ mitrāṇāṃ mitrapate dheṣṭha: |indra tvaṃ marudbhi: saṃ vadasvādha prāśāna ṛtuthā havīṃṣi ||