Mandala.Sukta 1.175

अगस्त्यो मैत्रावरुणिः । इन्द्रः। १ स्कंधोग्रीवी बृहती, २-५ अनुष्टुप्, ६ त्रिष्टुप्। · agastyo maitrāvaruṇiḥ | indraḥ | 1 skaṃdhogrīvī bṛhatī, 2-5 anuṣṭup, 6 triṣṭup |

मत्स्यपा॑यि ते॒ मह॒: पात्र॑स्येव हरिवो मत्स॒रो मद॑: ।वृषा॑ ते॒ वृष्ण॒ इन्दु॑र्वा॒जी स॑हस्र॒सात॑मः॥

matsyapāyi te maha: pātrasyeva harivo matsaro mada: |vṛṣā te vṛṣṇa indurvājī sahasrasātamaḥ ||

आ न॑स्ते गन्तु मत्स॒रो वृषा॒ मदो॒ वरे॑ण्यः ।स॒हावाँ॑ इन्द्र सान॒सिः पृ॑तना॒षाळम॑र्त्यः॥

ā naste gantu matsaro vṛṣā mado vareṇyaḥ |sahāvām̐ indra sānasiḥ pṛtanāṣāḷamartyaḥ ||

त्वं हि शूर॒: सनि॑ता चो॒दयो॒ मनु॑षो॒ रथ॑म् ।स॒हावा॒न् दस्यु॑मव्र॒तमोष॒: पात्रं॒ न शो॒चिषा॑॥

tvaṃ hi śūra: sanitā codayo manuṣo ratham |sahāvān dasyumavratamoṣa: pātraṃ na śociṣā ||

मु॒षा॒य सूर्यं॑ कवे च॒क्रमीशा॑न॒ ओज॑सा ।वह॒ शुष्णा॑य व॒धं कुत्सं॒ वात॒स्याश्वै॑:॥

muṣāya sūryaṃ kave cakramīśāna ojasā |vaha śuṣṇāya vadhaṃ kutsaṃ vātasyāśvai: ||

शु॒ष्मिन्त॑मो॒ हि ते॒ मदो॑ द्यु॒म्निन्त॑म उ॒त क्रतु॑: ।वृ॒त्र॒घ्ना व॑रिवो॒विदा॑ मंसी॒ष्ठा अ॑श्व॒सात॑मः॥

śuṣmintamo hi te mado dyumnintama uta kratu: |vṛtraghnā varivovidā maṃsīṣṭhā aśvasātamaḥ ||

यथा॒ पूर्वे॑भ्यो जरि॒तृभ्य॑ इन्द्र॒ मय॑ इ॒वापो॒ न तृष्य॑ते ब॒भूथ॑ ।तामनु॑ त्वा नि॒विदं॑ जोहवीमि वि॒द्यामे॒षं वृ॒जनं॑ जी॒रदा॑नुम्॥

yathā pūrvebhyo jaritṛbhya indra maya ivāpo na tṛṣyate babhūtha |tāmanu tvā nividaṃ johavīmi vidyāmeṣaṃ vṛjanaṃ jīradānum ||