Mandala.Sukta 1.181

अगस्त्यो मैत्रावरुणिः । अश्विनौ। त्रिष्टुप्। · agastyo maitrāvaruṇiḥ | aśvinau | triṣṭup |

कदु॒ प्रेष्टा॑वि॒षां र॑यी॒णाम॑ध्व॒र्यन्ता॒ यदु॑न्निनी॒थो अ॒पाम् ।अ॒यं वां॑ य॒ज्ञो अ॑कृत॒ प्रश॑स्तिं॒ वसु॑धिती॒ अवि॑तारा जनानाम्॥

kadu preṣṭāviṣāṃ rayīṇāmadhvaryantā yadunninītho apām |ayaṃ vāṃ yajño akṛta praśastiṃ vasudhitī avitārā janānām ||

आ वा॒मश्वा॑स॒: शुच॑यः पय॒स्पा वात॑रंहसो दि॒व्यासो॒ अत्या॑: ।म॒नो॒जुवो॒ वृष॑णो वी॒तपृ॑ष्ठा॒ एह स्व॒राजो॑ अ॒श्विना॑ वहन्तु॥

ā vāmaśvāsa: śucayaḥ payaspā vātaraṃhaso divyāso atyā: |manojuvo vṛṣaṇo vītapṛṣṭhā eha svarājo aśvinā vahantu ||

आ वां॒ रथो॒ऽवनि॒र्न प्र॒वत्वा॑न् त्सृ॒प्रव॑न्धुरः सुवि॒ताय॑ गम्याः ।वृष्ण॑: स्थातारा॒ मन॑सो॒ जवी॑यानहम्पू॒र्वो य॑ज॒तो धि॑ष्ण्या॒ यः॥

ā vāṃ ratho'vanirna pravatvān tsṛpravandhuraḥ suvitāya gamyāḥ |vṛṣṇa: sthātārā manaso javīyānahampūrvo yajato dhiṣṇyā yaḥ ||

इ॒हेह॑ जा॒ता सम॑वावशीतामरे॒पसा॑ त॒न्वा॒३ नाम॑भि॒: स्वैः ।जि॒ष्णुर्वा॑म॒न्यः सुम॑खस्य सू॒रिर्दि॒वो अ॒न्यः सु॒भग॑: पु॒त्र ऊ॑हे॥

iheha jātā samavāvaśītāmarepasā tanvā3 nāmabhi: svaiḥ |jiṣṇurvāmanyaḥ sumakhasya sūrirdivo anyaḥ subhaga: putra ūhe ||

प्र वां॑ निचे॒रुः क॑कु॒हो वशाँ॒ अनु॑ पि॒शङ्ग॑रूप॒: सद॑नानि गम्याः ।हरी॑ अ॒न्यस्य॑ पी॒पय॑न्त॒ वाजै॑र्म॒थ्रा रजां॑स्यश्विना॒ वि घोषै॑: ॥५प्र वां॑ श॒रद्वा॑न् वृष॒भो न नि॒ष्षाट् पू॒र्वीरिष॑श्चरति॒ मध्व॑ इ॒ष्णन् ।एवै॑र॒न्यस्य॑ पी॒पय॑न्त॒ वाजै॒र्वेष॑न्तीरू॒र्ध्वा न॒द्यो॑ न॒ आगु॑:॥

pra vāṃ niceruḥ kakuho vaśām̐ anu piśaṅgarūpa: sadanāni gamyāḥ |harī anyasya pīpayanta vājairmathrā rajāṃsyaśvinā vi ghoṣai: ||5pra vāṃ śaradvān vṛṣabho na niṣṣāṭ pūrvīriṣaścarati madhva iṣṇan |evairanyasya pīpayanta vājairveṣantīrūrdhvā nadyo na āgu: ||

अस॑र्जि वां॒ स्थवि॑रा वेधसा॒ गीर्बा॒ळहे अ॑श्विना त्रे॒धा क्षर॑न्ती ।उप॑स्तुताववतं॒ नाध॑मानं॒ याम॒न्नया॑मञ्छृणुतं॒ हवं॑ मे॥

asarji vāṃ sthavirā vedhasā gīrbāḷahe aśvinā tredhā kṣarantī |upastutāvavataṃ nādhamānaṃ yāmannayāmañchṛṇutaṃ havaṃ me ||

उ॒त स्या वां॒ रुश॑तो॒ वप्स॑सो॒ गीस्त्रि॑ब॒र्हिषि॒ सद॑सि पिन्वते॒ नॄन् ।वृषा॑ वां मे॒घो वृ॑षणा पीपाय॒ गोर्न सेके॒ मनु॑षो दश॒स्यन्॥

uta syā vāṃ ruśato vapsaso gīstribarhiṣi sadasi pinvate nṝn |vṛṣā vāṃ megho vṛṣaṇā pīpāya gorna seke manuṣo daśasyan ||

यु॒वां पू॒षेवा॑श्विना॒ पुरं॑धिर॒ग्निमु॒षां न ज॑रते ह॒विष्मा॑न् ।हु॒वे यद् वां॑ वरिव॒स्या गृ॑णा॒नो वि॒द्यामे॒षं वृ॒जनं॑ जी॒रदा॑नुम्॥

yuvāṃ pūṣevāśvinā puraṃdhiragnimuṣāṃ na jarate haviṣmān |huve yad vāṃ varivasyā gṛṇāno vidyāmeṣaṃ vṛjanaṃ jīradānum ||