Mandala.Sukta 1.28

आजीगर्तिः शुनःशेप स कृत्रिमो वैश्वामित्रो देवरातः। १-४ इन्द्रः, ५-६ उलू खलं, ७-८ उलूखल मुसले, ९ प्रजापतिर्हरि श्चन्द्रः, (अधिषवण) चर्म सोमो वा। १-६ अनुष्टुप्, ७-९ गायत्री। · ājīgartiḥ śunaḥśepa sa kṛtrimo vaiśvāmitro devarātaḥ | 1-4 indraḥ, 5-6 ulū khalaṃ, 7-8 ulūkhala musale, 9 prajāpatirhari ścandraḥ, (adhiṣavaṇa) carma somo vā | 1-6 anuṣṭup, 7-9 gāyatrī |

यत्र॒ ग्रावा॑ पृ॒थुबु॑ध्न ऊ॒र्ध्वो भव॑ति॒ सोत॑वे ।उ॒लूख॑लसुताना॒मवेद्वि॑न्द्र जल्गुलः॥

yatra grāvā pṛthubudhna ūrdhvo bhavati sotave |ulūkhalasutānāmavedvindra jalgulaḥ ||

यत्र॒ द्वावि॑व ज॒घना॑धिषव॒ण्या॑ कृ॒ता ।उ॒लूख॑लसुताना॒मवेद्वि॑न्द्र जल्गुलः॥

yatra dvāviva jaghanādhiṣavaṇyā kṛtā |ulūkhalasutānāmavedvindra jalgulaḥ ||

यत्र॒ नार्य॑पच्य॒वमु॑पच्य॒वं च॒ शिक्ष॑ते ।उ॒लूख॑लसुताना॒मवेद्वि॑न्द्र जल्गुलः॥

yatra nāryapacyavamupacyavaṃ ca śikṣate |ulūkhalasutānāmavedvindra jalgulaḥ ||

यत्र॒ मन्थां॑ विब॒ध्नते॑ र॒श्मीन् यमि॑त॒वा इ॑व ।उ॒लूख॑लसुताना॒मवेद्वि॑न्द्र जल्गुलः॥

yatra manthāṃ vibadhnate raśmīn yamitavā iva |ulūkhalasutānāmavedvindra jalgulaḥ ||

यच्चि॒द्धि त्वं गृ॒हेगृ॑ह॒ उलू॑खलक यु॒ज्यसे॑ ।इ॒ह द्यु॒मत्त॑मं वद॒ जय॑तामिव दुन्दु॒भिः॥

yacciddhi tvaṃ gṛhegṛha ulūkhalaka yujyase |iha dyumattamaṃ vada jayatāmiva dundubhiḥ ||

उ॒त स्म॑ ते वनस्पते॒ वातो॒ वि वा॒त्यग्र॒मित् ।अथो॒ इन्द्रा॑य॒ पात॑वे सु॒नु सोम॑मुलूखल॥

uta sma te vanaspate vāto vi vātyagramit |atho indrāya pātave sunu somamulūkhala ||

आ॒य॒जी वा॑ज॒सात॑मा॒ ता ह्यु१च्चा वि॑जर्भृ॒तः ।हरी॑ इ॒वान्धां॑सि॒ बप्स॑ता॥

āyajī vājasātamā tā hyu1ccā vijarbhṛtaḥ |harī ivāndhāṃsi bapsatā ||

ता नो॑ अ॒द्य व॑नस्पती ऋ॒ष्वावृ॒ष्वेभि॑: सो॒तृभि॑: ।इन्द्रा॑य॒ मधु॑मत्सुतम्॥

tā no adya vanaspatī ṛṣvāvṛṣvebhi: sotṛbhi: |indrāya madhumatsutam ||

उच्छि॒ष्टं च॒म्वो॑र्भर॒ सोमं॑ प॒वित्र॒ आ सृ॑ज ।नि धे॑हि॒ गोरधि॑ त्व॒चि॥

ucchiṣṭaṃ camvorbhara somaṃ pavitra ā sṛja |ni dhehi goradhi tvaci ||