Mandala.Sukta 1.82

गोतमो राहूगणः। इन्द्रः। पंक्तिः, ६ जगती। · gotamo rāhūgaṇaḥ | indraḥ | paṃktiḥ, 6 jagatī |

उपो॒ षु शृ॑णु॒ही गिरो॒ मघ॑व॒न् मात॑था इव ।य॒दा न॑: सू॒नृता॑वत॒: कर॒ आद॒र्थया॑स॒ इद् योजा॒ न्वि॑न्द्र ते॒ हरी॑॥

upo ṣu śṛṇuhī giro maghavan mātathā iva |yadā na: sūnṛtāvata: kara ādarthayāsa id yojā nvindra te harī ||

अक्ष॒न्नमी॑मदन्त॒ ह्यव॑ प्रि॒या अ॑धूषत ।अस्तो॑षत॒ स्वभा॑नवो॒ विप्रा॒ नवि॑ष्ठया म॒ती योजा॒ न्वि॑न्द्र ते॒ हरी॑॥

akṣannamīmadanta hyava priyā adhūṣata |astoṣata svabhānavo viprā naviṣṭhayā matī yojā nvindra te harī ||

सु॒सं॒दृशं॑ त्वा व॒यं मघ॑वन् वन्दिषी॒महि॑ ।प्र नू॒नं पू॒र्णव॑न्धुरः स्तु॒तो या॑हि॒ वशाँ॒ अनु॒ योजा॒ न्वि॑न्द्र ते॒ हरी॑॥

susaṃdṛśaṃ tvā vayaṃ maghavan vandiṣīmahi |pra nūnaṃ pūrṇavandhuraḥ stuto yāhi vaśām̐ anu yojā nvindra te harī ||

स घा॒ तं वृष॑णं॒ रथ॒मधि॑ तिष्ठाति गो॒विद॑म् ।यः पात्रं॑ हारियोज॒नं पू॒र्णमि॑न्द्र॒ चिके॑तति॒ योजा॒ न्वि॑न्द्र ते॒ हरी॑॥

sa ghā taṃ vṛṣaṇaṃ rathamadhi tiṣṭhāti govidam |yaḥ pātraṃ hāriyojanaṃ pūrṇamindra ciketati yojā nvindra te harī ||

यु॒क्तस्ते॑ अस्तु॒ दक्षि॑ण उ॒त स॒व्यः श॑तक्रतो ।तेन॑ जा॒यामुप॑ प्रि॒यां म॑न्दा॒नो या॒ह्यन्ध॑सो॒ योजा॒ न्वि॑न्द्र ते॒ हरी॑॥

yuktaste astu dakṣiṇa uta savyaḥ śatakrato |tena jāyāmupa priyāṃ mandāno yāhyandhaso yojā nvindra te harī ||

यु॒नज्मि॑ ते॒ ब्रह्म॑णा के॒शिना॒ हरी॒ उप॒ प्र या॑हि दधि॒षे गभ॑स्त्योः ।उत् त्वा॑ सु॒तासो॑ रभ॒सा अ॑मन्दिषुः पूष॒ण्वान् व॑ज्रि॒न्त्समु॒ पत्न्या॑मदः॥

yunajmi te brahmaṇā keśinā harī upa pra yāhi dadhiṣe gabhastyoḥ |ut tvā sutāso rabhasā amandiṣuḥ pūṣaṇvān vajrintsamu patnyāmadaḥ ||