Mandala.Sukta 1.87

गोतमो राहूगणः। मरुतः। जगती। · gotamo rāhūgaṇaḥ | marutaḥ | jagatī |

प्रत्व॑क्षस॒: प्रत॑वसो विर॒प्शिनो ऽना॑नता॒ अवि॑थुरा ऋजी॒षिण॑: ।जुष्ट॑तमासो॒ नृत॑मासो अ॒ञ्जिभि॒र्व्या॑नज्रे॒ के चि॑दु॒स्रा इ॑व॒ स्तृभि॑:॥

pratvakṣasa: pratavaso virapśino 'nānatā avithurā ṛjīṣiṇa: |juṣṭatamāso nṛtamāso añjibhirvyānajre ke cidusrā iva stṛbhi: ||

उ॒प॒ह्व॒रेषु॒ यदचि॑ध्वं य॒यिं वय॑ इव मरुत॒: केन॑ चित् प॒था ।श्चोत॑न्ति॒ कोशा॒ उप॑ वो॒ रथे॒ष्वा घृ॒तमु॑क्षता॒ मधु॑वर्ण॒मर्च॑ते॥

upahvareṣu yadacidhvaṃ yayiṃ vaya iva maruta: kena cit pathā |ścotanti kośā upa vo ratheṣvā ghṛtamukṣatā madhuvarṇamarcate ||

प्रैषा॒मज्मे॑षु विथु॒रेव॑ रेजते॒ भूमि॒र्यामे॑षु॒ यद्ध॑ यु॒ञ्जते॑ शु॒भे ।ते क्री॒ळयो॒ धुन॑यो॒ भ्राज॑दृष्टयः स्व॒यं म॑हि॒त्वं प॑नयन्त॒ धूत॑यः॥

praiṣāmajmeṣu vithureva rejate bhūmiryāmeṣu yaddha yuñjate śubhe |te krīḷayo dhunayo bhrājadṛṣṭayaḥ svayaṃ mahitvaṃ panayanta dhūtayaḥ ||

स हि स्व॒सृत् पृष॑दश्वो॒ युवा॑ ग॒णो॒ ३ ऽया ई॑शा॒नस्तवि॑षीभि॒रावृ॑तः ।असि॑ स॒त्य ऋ॑ण॒यावाने॑द्यो॒ ऽस्या धि॒यः प्रा॑वि॒ताथा॒ वृषा॑ ग॒णः॥

sa hi svasṛt pṛṣadaśvo yuvā gaṇo 3 'yā īśānastaviṣībhirāvṛtaḥ |asi satya ṛṇayāvānedyo 'syā dhiyaḥ prāvitāthā vṛṣā gaṇaḥ ||

पि॒तुः प्र॒त्नस्य॒ जन्म॑ना वदामसि॒ सोम॑स्य जि॒ह्वा प्र जि॑गाति॒ चक्ष॑सा ।यदी॒मिन्द्रं॒ शम्यृक्वा॑ण॒ आश॒तादिन्नामा॑नि य॒ज्ञिया॑नि दधिरे॥

pituḥ pratnasya janmanā vadāmasi somasya jihvā pra jigāti cakṣasā |yadīmindraṃ śamyṛkvāṇa āśatādinnāmāni yajñiyāni dadhire ||

श्रि॒यसे॒ कं भा॒नुभि॒: सं मि॑मिक्षिरे॒ ते र॒श्मिभि॒स्त ऋक्व॑भिः सुखा॒दय॑: ।ते वाशी॑मन्त इ॒ष्मिणो॒ अभी॑रवो वि॒द्रे प्रि॒यस्य॒ मारु॑तस्य॒ धाम्न॑:॥

śriyase kaṃ bhānubhi: saṃ mimikṣire te raśmibhista ṛkvabhiḥ sukhādaya: |te vāśīmanta iṣmiṇo abhīravo vidre priyasya mārutasya dhāmna: ||