Mandala.Sukta 10.118

उरुक्षय आमहीयवः। रक्षोहाऽग्निः। गायत्री। · urukṣaya āmahīyavaḥ | rakṣohā'gniḥ | gāyatrī |

अग्ने॒ हंसि॒ न्य१त्रिणं॒ दीद्य॒न्मर्त्ये॒ष्वा ।स्वे क्षये॑ शुचिव्रत॥

agne haṃsi nya1triṇaṃ dīdyanmartyeṣvā |sve kṣaye śucivrata ||

उत्ति॑ष्ठसि॒ स्वा॑हुतो घृ॒तानि॒ प्रति॑ मोदसे ।यत्त्वा॒ स्रुच॑: स॒मस्थि॑रन्॥

uttiṣṭhasi svāhuto ghṛtāni prati modase |yattvā sruca: samasthiran ||

स आहु॑तो॒ वि रो॑चते॒ऽग्निरी॒ळेन्यो॑ गि॒रा ।स्रु॒चा प्रती॑कमज्यते॥

sa āhuto vi rocate'gnirīḷenyo girā |srucā pratīkamajyate ||

घृ॒तेना॒ग्निः सम॑ज्यते॒ मधु॑प्रतीक॒ आहु॑तः ।रोच॑मानो वि॒भाव॑सुः॥

ghṛtenāgniḥ samajyate madhupratīka āhutaḥ |rocamāno vibhāvasuḥ ||

जर॑माण॒: समि॑ध्यसे दे॒वेभ्यो॑ हव्यवाहन ।तं त्वा॑ हवन्त॒ मर्त्या॑:॥

jaramāṇa: samidhyase devebhyo havyavāhana |taṃ tvā havanta martyā: ||

तं म॑र्ता॒ अम॑र्त्यं घृ॒तेना॒ग्निं स॑पर्यत ।अदा॑भ्यं गृ॒हप॑तिम्॥

taṃ martā amartyaṃ ghṛtenāgniṃ saparyata |adābhyaṃ gṛhapatim ||

अदा॑भ्येन शो॒चिषाऽग्ने॒ रक्ष॒स्त्वं द॑ह ।गो॒पा ऋ॒तस्य॑ दीदिहि॥

adābhyena śociṣā'gne rakṣastvaṃ daha |gopā ṛtasya dīdihi ||

स त्वम॑ग्ने॒ प्रती॑केन॒ प्रत्यो॑ष यातुधा॒न्य॑: ।उ॒रु॒क्षये॑षु॒ दीद्य॑त्॥

sa tvamagne pratīkena pratyoṣa yātudhānya: |urukṣayeṣu dīdyat ||

तं त्वा॑ गी॒र्भिरु॑रु॒क्षया॑ हव्य॒वाहं॒ समी॑धिरे ।यजि॑ष्ठं॒ मानु॑षे॒ जने॑॥

taṃ tvā gīrbhirurukṣayā havyavāhaṃ samīdhire |yajiṣṭhaṃ mānuṣe jane ||