Mandala.Sukta 10.129

प्रजापतिः परमेष्ठी। भाववृत्तम्। त्रिष्टुप्। · prajāpatiḥ parameṣṭhī | bhāvavṛttam | triṣṭup |

नास॑दासी॒न्नो सदा॑सीत्त॒दानीं॒ नासी॒द्रजो॒ नो व्यो॑मा प॒रो यत् ।किमाव॑रीव॒: कुह॒ कस्य॒ शर्म॒न्नम्भ॒: किमा॑सी॒द्गह॑नं गभी॒रम्॥

nāsadāsīnno sadāsīttadānīṃ nāsīdrajo no vyomā paro yat |kimāvarīva: kuha kasya śarmannambha: kimāsīdgahanaṃ gabhīram ||

न मृ॒त्युरा॑सीद॒मृतं॒ न तर्हि॒ न रात्र्या॒ अह्न॑ आसीत्प्रके॒तः ।आनी॑दवा॒तं स्व॒धया॒ तदेकं॒ तस्मा॑द्धा॒न्यन्न प॒रः किं च॒नास॑॥

na mṛtyurāsīdamṛtaṃ na tarhi na rātryā ahna āsītpraketaḥ |ānīdavātaṃ svadhayā tadekaṃ tasmāddhānyanna paraḥ kiṃ canāsa ||

तम॑ आसी॒त्तम॑सा गू॒ळ्हमग्रे॑ऽप्रके॒तं स॑लि॒लं सर्व॑मा इ॒दम् ।तु॒च्छ्येना॒भ्वपि॑हितं॒ यदासी॒त्तप॑स॒स्तन्म॑हि॒नाजा॑य॒तैक॑म्॥

tama āsīttamasā gūḷhamagre'praketaṃ salilaṃ sarvamā idam |tucchyenābhvapihitaṃ yadāsīttapasastanmahinājāyataikam ||

काम॒स्तदग्रे॒ सम॑वर्त॒ताधि॒ मन॑सो॒ रेत॑: प्रथ॒मं यदासी॑त् ।स॒तो बन्धु॒मस॑ति॒ निर॑विन्दन्हृ॒दि प्र॒तीष्या॑ क॒वयो॑ मनी॒षा॥

kāmastadagre samavartatādhi manaso reta: prathamaṃ yadāsīt |sato bandhumasati niravindanhṛdi pratīṣyā kavayo manīṣā ||

ति॒र॒श्चीनो॒ वित॑तो र॒श्मिरे॑षाम॒धः स्वि॑दा॒सी३दु॒परि॑ स्विदासी३त् ।रे॒तो॒धा आ॑सन्महि॒मान॑ आसन्त्स्व॒धा अ॒वस्ता॒त्प्रय॑तिः प॒रस्ता॑त्॥

tiraścīno vitato raśmireṣāmadhaḥ svidāsī3dupari svidāsī3t |retodhā āsanmahimāna āsantsvadhā avastātprayatiḥ parastāt ||

को अ॒द्धा वे॑द॒ क इ॒ह प्र वो॑च॒त्कुत॒ आजा॑ता॒ कुत॑ इ॒यं विसृ॑ष्टिः ।अ॒र्वाग्दे॒वा अ॒स्य वि॒सर्ज॑ने॒नाऽथा॒ को वे॑द॒ यत॑ आब॒भूव॑॥

ko addhā veda ka iha pra vocatkuta ājātā kuta iyaṃ visṛṣṭiḥ |arvāgdevā asya visarjanenā'thā ko veda yata ābabhūva ||

इ॒यं विसृ॑ष्टि॒र्यत॑ आब॒भूव॒ यदि॑ वा द॒धे यदि॑ वा॒ न ।यो अ॒स्याध्य॑क्षः पर॒मे व्यो॑म॒न्त्सो अ॒ङ्ग वे॑द॒ यदि॑ वा॒ न वेद॑॥

iyaṃ visṛṣṭiryata ābabhūva yadi vā dadhe yadi vā na |yo asyādhyakṣaḥ parame vyomantso aṅga veda yadi vā na veda ||