Mandala.Sukta 10.132

शकपूतो नार्मेधः। मित्रावरुणौ, १ द्युभूम्यश्विनः। विराड्रूपा, १ न्यङ्कुसारिणी, २,६ प्रस्तारपंक्तिः, ७ महासतोबृहती। · śakapūto nārmedhaḥ | mitrāvaruṇau, 1 dyubhūmyaśvinaḥ | virāḍrūpā, 1 nyaṅkusāriṇī, 2,6 prastārapaṃktiḥ, 7 mahāsatobṛhatī |

ई॒जा॒नमिद्द्यौर्गू॒र्ताव॑सुरीजा॒नं भूमि॑र॒भि प्र॑भू॒षणि॑ ।ई॒जा॒नं दे॒वाव॒श्विना॑व॒भि सु॒म्नैर॑वर्धताम्॥

ījānamiddyaurgūrtāvasurījānaṃ bhūmirabhi prabhūṣaṇi |ījānaṃ devāvaśvināvabhi sumnairavardhatām ||

ता वां॑ मित्रावरुणा धार॒यत्क्षि॑ती सुषु॒म्नेषि॑त॒त्वता॑ यजामसि ।यु॒वोः क्रा॒णाय॑ स॒ख्यैर॒भि ष्या॑म र॒क्षस॑:॥

tā vāṃ mitrāvaruṇā dhārayatkṣitī suṣumneṣitatvatā yajāmasi |yuvoḥ krāṇāya sakhyairabhi ṣyāma rakṣasa: ||

अधा॑ चि॒न्नु यद्दिधि॑षामहे वाम॒भि प्रि॒यं रेक्ण॒: पत्य॑मानाः ।द॒द्वाँ वा॒ यत्पुष्य॑ति॒ रेक्ण॒: सम्वा॑र॒न्नकि॑रस्य म॒घानि॑॥

adhā cinnu yaddidhiṣāmahe vāmabhi priyaṃ rekṇa: patyamānāḥ |dadvām̐ vā yatpuṣyati rekṇa: samvārannakirasya maghāni ||

अ॒साव॒न्यो अ॑सुर सूयत॒ द्यौस्त्वं विश्वे॑षां वरुणासि॒ राजा॑ ।मू॒र्धा रथ॑स्य चाक॒न्नैताव॒तैन॑सान्तक॒ध्रुक्॥

asāvanyo asura sūyata dyaustvaṃ viśveṣāṃ varuṇāsi rājā |mūrdhā rathasya cākannaitāvatainasāntakadhruk ||

अ॒स्मिन्त्स्वे॒३तच्छक॑पूत॒ एनो॑ हि॒ते मि॒त्रे निग॑तान्हन्ति वी॒रान् ।अ॒वोर्वा॒ यद्धात्त॒नूष्वव॑: प्रि॒यासु॑ य॒ज्ञिया॒स्वर्वा॑॥

asmintsve3tacchakapūta eno hite mitre nigatānhanti vīrān |avorvā yaddhāttanūṣvava: priyāsu yajñiyāsvarvā ||

यु॒वोर्हि मा॒तादि॑तिर्विचेतसा॒ द्यौर्न भूमि॒: पय॑सा पुपू॒तनि॑ ।अव॑ प्रि॒या दि॑दिष्टन॒ सूरो॑ निनिक्त र॒श्मिभि॑:॥

yuvorhi mātāditirvicetasā dyaurna bhūmi: payasā pupūtani |ava priyā didiṣṭana sūro ninikta raśmibhi: ||

यु॒वं ह्य॑प्न॒राजा॒वसी॑दतं॒ तिष्ठ॒द्रथं॒ न धू॒र्षदं॑ वन॒र्षद॑म् ।ता न॑: कणूक॒यन्ती॑र्नृ॒मेध॑स्तत्रे॒ अंह॑सः सु॒मेध॑स्तत्रे॒ अंह॑सः॥

yuvaṃ hyapnarājāvasīdataṃ tiṣṭhadrathaṃ na dhūrṣadaṃ vanarṣadam |tā na: kaṇūkayantīrnṛmedhastatre aṃhasaḥ sumedhastatre aṃhasaḥ ||