Mandala.Sukta 10.137

,१ भरद्वाज:, २ कश्यपः, ३ गौतमः, ४ अत्रिः, ५ विश्वामित्रः, ६ जमदग्निः, ७ वसिष्ठः। विश्वेदेवाः। अनुष्टुप्। · ,1 bharadvāja:, 2 kaśyapaḥ, 3 gautamaḥ, 4 atriḥ, 5 viśvāmitraḥ, 6 jamadagniḥ, 7 vasiṣṭhaḥ | viśvedevāḥ | anuṣṭup |

उ॒त दे॑वा॒ अव॑हितं॒ देवा॒ उन्न॑यथा॒ पुन॑: ।उ॒ताग॑श्च॒क्रुषं॑ देवा॒ देवा॑ जी॒वय॑था॒ पुन॑:॥

uta devā avahitaṃ devā unnayathā puna: |utāgaścakruṣaṃ devā devā jīvayathā puna: ||

द्वावि॒मौ वातौ॑ वात॒ आ सिन्धो॒रा प॑रा॒वत॑: ।दक्षं॑ ते अ॒न्य आ वा॑तु॒ परा॒न्यो वा॑तु॒ यद्रप॑:॥

dvāvimau vātau vāta ā sindhorā parāvata: |dakṣaṃ te anya ā vātu parānyo vātu yadrapa: ||

आ वा॑त वाहि भेष॒जं वि वा॑त वाहि॒ यद्रप॑: ।त्वं हि वि॒श्वभे॑षजो दे॒वानां॑ दू॒त ईय॑से॥

ā vāta vāhi bheṣajaṃ vi vāta vāhi yadrapa: |tvaṃ hi viśvabheṣajo devānāṃ dūta īyase ||

आ त्वा॑गमं॒ शंता॑तिभि॒रथो॑ अरि॒ष्टता॑तिभिः ।दक्षं॑ ते भ॒द्रमाभा॑र्षं॒ परा॒ यक्ष्मं॑ सुवामि ते॥

ā tvāgamaṃ śaṃtātibhiratho ariṣṭatātibhiḥ |dakṣaṃ te bhadramābhārṣaṃ parā yakṣmaṃ suvāmi te ||

त्राय॑न्तामि॒ह दे॒वास्त्राय॑तां म॒रुतां॑ ग॒णः ।त्राय॑न्तां॒ विश्वा॑ भू॒तानि॒ यथा॒यम॑र॒पा अस॑त्॥

trāyantāmiha devāstrāyatāṃ marutāṃ gaṇaḥ |trāyantāṃ viśvā bhūtāni yathāyamarapā asat ||

आप॒ इद्वा उ॑ भेष॒जीरापो॑ अमीव॒चात॑नीः ।आप॒: सर्व॑स्य भेष॒जीस्तास्ते॑ कृण्वन्तु भेष॒जम्॥

āpa idvā u bheṣajīrāpo amīvacātanīḥ |āpa: sarvasya bheṣajīstāste kṛṇvantu bheṣajam ||

हस्ता॑भ्यां॒ दश॑शाखाभ्यां जि॒ह्वा वा॒चः पु॑रोग॒वी ।अ॒ना॒म॒यि॒त्नुभ्यां॑ त्वा॒ ताभ्यां॒ त्वोप॑ स्पृशामसि॥

hastābhyāṃ daśaśākhābhyāṃ jihvā vācaḥ purogavī |anāmayitnubhyāṃ tvā tābhyāṃ tvopa spṛśāmasi ||