Mandala.Sukta 10.144

तार्क्ष्र्यः सुपर्णः, यामायन ऊर्ध्वकृशनो वा। इन्द्रः। गायत्री, २ बृहती, ५ सतोबृहती, ६ विष्टारपंक्तिः। · tārkṣryaḥ suparṇaḥ, yāmāyana ūrdhvakṛśano vā | indraḥ | gāyatrī, 2 bṛhatī, 5 satobṛhatī, 6 viṣṭārapaṃktiḥ |

अ॒यं हि ते॒ अम॑र्त्य॒ इन्दु॒रत्यो॒ न पत्य॑ते ।दक्षो॑ वि॒श्वायु॑र्वे॒धसे॑॥

ayaṃ hi te amartya induratyo na patyate |dakṣo viśvāyurvedhase ||

अ॒यम॒स्मासु॒ काव्य॑ ऋ॒भुर्वज्रो॒ दास्व॑ते ।अ॒यं बि॑भर्त्यू॒र्ध्वकृ॑शनं॒ मद॑मृ॒भुर्न कृत्व्यं॒ मद॑म्॥

ayamasmāsu kāvya ṛbhurvajro dāsvate |ayaṃ bibhartyūrdhvakṛśanaṃ madamṛbhurna kṛtvyaṃ madam ||

घृषु॑: श्ये॒नाय॒ कृत्व॑न आ॒सु स्वासु॒ वंस॑गः ।अव॑ दीधेदही॒शुव॑:॥

ghṛṣu: śyenāya kṛtvana āsu svāsu vaṃsagaḥ |ava dīdhedahīśuva: ||

यं सु॑प॒र्णः प॑रा॒वत॑: श्ये॒नस्य॑ पु॒त्र आभ॑रत् ।श॒तच॑क्रं॒ यो॒३ऽह्यो॑ वर्त॒निः॥

yaṃ suparṇaḥ parāvata: śyenasya putra ābharat |śatacakraṃ yo3'hyo vartaniḥ ||

यं ते॑ श्ये॒नश्चारु॑मवृ॒कं प॒दाभ॑रदरु॒णं मा॒नमन्ध॑सः ।ए॒ना वयो॒ वि ता॒र्यायु॑र्जी॒वस॑ ए॒ना जा॑गार ब॒न्धुता॑॥

yaṃ te śyenaścārumavṛkaṃ padābharadaruṇaṃ mānamandhasaḥ |enā vayo vi tāryāyurjīvasa enā jāgāra bandhutā ||

ए॒वा तदिन्द्र॒ इन्दु॑ना दे॒वेषु॑ चिद्धारयाते॒ महि॒ त्यज॑: ।क्रत्वा॒ वयो॒ वि ता॒र्यायु॑: सुक्रतो॒ क्रत्वा॒यम॒स्मदा सु॒तः॥

evā tadindra indunā deveṣu ciddhārayāte mahi tyaja: |kratvā vayo vi tāryāyu: sukrato kratvāyamasmadā sutaḥ ||