Mandala.Sukta 10.167

विश्वामित्र-जमदग्नी। इन्द्रः, ३ सोम-वरुण-बृहस्पति-अनुमति-मघवत्-धातृ-विधातारः। जगती । · viśvāmitra-jamadagnī | indraḥ, 3 soma-varuṇa-bṛhaspati-anumati-maghavat-dhātṛ-vidhātāraḥ | jagatī |

तुभ्ये॒दमि॑न्द्र॒ परि॑ षिच्यते॒ मधु॒ त्वं सु॒तस्य॑ क॒लश॑स्य राजसि ।त्वं र॒यिं पु॑रु॒वीरा॑मु नस्कृधि॒ त्वं तप॑: परि॒तप्या॑जय॒: स्व॑:॥

tubhyedamindra pari ṣicyate madhu tvaṃ sutasya kalaśasya rājasi |tvaṃ rayiṃ puruvīrāmu naskṛdhi tvaṃ tapa: paritapyājaya: sva: ||

स्व॒र्जितं॒ महि॑ मन्दा॒नमन्ध॑सो॒ हवा॑महे॒ परि॑ श॒क्रं सु॒ताँ उप॑ ।इ॒मं नो॑ य॒ज्ञमि॒ह बो॒ध्या ग॑हि॒ स्पृधो॒ जय॑न्तं म॒घवा॑नमीमहे॥

svarjitaṃ mahi mandānamandhaso havāmahe pari śakraṃ sutām̐ upa |imaṃ no yajñamiha bodhyā gahi spṛdho jayantaṃ maghavānamīmahe ||

सोम॑स्य॒ राज्ञो॒ वरु॑णस्य॒ धर्म॑णि॒ बृह॒स्पते॒रनु॑मत्या उ॒ शर्म॑णि ।तवा॒हम॒द्य म॑घव॒न्नुप॑स्तुतौ॒ धात॒र्विधा॑तः क॒लशाँ॑ अभक्षयम्॥

somasya rājño varuṇasya dharmaṇi bṛhaspateranumatyā u śarmaṇi |tavāhamadya maghavannupastutau dhātarvidhātaḥ kalaśām̐ abhakṣayam ||

प्रसू॑तो भ॒क्षम॑करं च॒रावपि॒ स्तोमं॑ चे॒मं प्र॑थ॒मः सू॒रिरुन्मृ॑जे ।सु॒ते सा॒तेन॒ यद्याग॑मं वां॒ प्रति॑ विश्वामित्रजमदग्नी॒ दमे॑॥

prasūto bhakṣamakaraṃ carāvapi stomaṃ cemaṃ prathamaḥ sūrirunmṛje |sute sātena yadyāgamaṃ vāṃ prati viśvāmitrajamadagnī dame ||