Mandala.Sukta 10.187

आग्नेयो वत्सः। अग्निः। गायत्री। · āgneyo vatsaḥ | agniḥ | gāyatrī |

प्राग्नये॒ वाच॑मीरय वृष॒भाय॑ क्षिती॒नाम् ।स न॑: पर्ष॒दति॒ द्विष॑:॥

prāgnaye vācamīraya vṛṣabhāya kṣitīnām |sa na: parṣadati dviṣa: ||

यः पर॑स्याः परा॒वत॑स्ति॒रो धन्वा॑ति॒रोच॑ते ।स न॑: पर्ष॒दति॒ द्विष॑:॥

yaḥ parasyāḥ parāvatastiro dhanvātirocate |sa na: parṣadati dviṣa: ||

यो रक्षां॑सि नि॒जूर्व॑ति॒ वृषा॑ शु॒क्रेण॑ शो॒चिषा॑ ।स न॑: पर्ष॒दति॒ द्विष॑:॥

yo rakṣāṃsi nijūrvati vṛṣā śukreṇa śociṣā |sa na: parṣadati dviṣa: ||

यो विश्वा॒भि वि॒पश्य॑ति॒ भुव॑ना॒ सं च॒ पश्य॑ति ।स न॑: पर्ष॒दति॒ द्विष॑:॥

yo viśvābhi vipaśyati bhuvanā saṃ ca paśyati |sa na: parṣadati dviṣa: ||

यो अ॒स्य पा॒रे रज॑सः शु॒क्रो अ॒ग्निरजा॑यत ।स न॑: पर्ष॒दति॒ द्विष॑:॥

yo asya pāre rajasaḥ śukro agnirajāyata |sa na: parṣadati dviṣa: ||