Mandala.Sukta 10.20

ऐन्द्रो विमदः प्राजापत्यो वा, वासुक्रो वसुकृद्वा। अग्निः। गायत्री, १ एकपदा विराट् (एष मन्त्र: शान्त्यर्थः) २अनुष्टुप्,९ विराट् १० त्रिष्टुप्। · aindro vimadaḥ prājāpatyo vā, vāsukro vasukṛdvā | agniḥ | gāyatrī, 1 ekapadā virāṭ (eṣa mantra: śāntyarthaḥ) 2anuṣṭup,9 virāṭ 10 triṣṭup |

भ॒द्रं नो॒ अपि॑ वातय॒ मन॑:॥

bhadraṃ no api vātaya mana: ||

अ॒ग्निमी॑ळे भु॒जां यवि॑ष्ठं शा॒सा मि॒त्रं दु॒र्धरी॑तुम् ।यस्य॒ धर्म॒न्त्स्व१रेनी॑: सप॒र्यन्ति॑ मा॒तुरूध॑:॥

agnimīḷe bhujāṃ yaviṣṭhaṃ śāsā mitraṃ durdharītum |yasya dharmantsva1renī: saparyanti māturūdha: ||

यमा॒सा कृ॒पनी॑ळं भा॒साके॑तुं व॒र्धय॑न्ति ।भ्राज॑ते॒ श्रेणि॑दन्॥

yamāsā kṛpanīḷaṃ bhāsāketuṃ vardhayanti |bhrājate śreṇidan ||

अ॒र्यो वि॒शां गा॒तुरे॑ति॒ प्र यदान॑ड्दि॒वो अन्ता॑न् ।क॒विर॒भ्रं दीद्या॑नः॥

aryo viśāṃ gātureti pra yadānaḍdivo antān |kavirabhraṃ dīdyānaḥ ||

जु॒षद्ध॒व्या मानु॑षस्यो॒र्ध्वस्त॑स्था॒वृभ्वा॑ य॒ज्ञे ।मि॒न्वन्त्सद्म॑ पु॒र ए॑ति॥

juṣaddhavyā mānuṣasyordhvastasthāvṛbhvā yajñe |minvantsadma pura eti ||

स हि क्षेमो॑ ह॒विर्य॒ज्ञः श्रु॒ष्टीद॑स्य गा॒तुरे॑ति ।अ॒ग्निं दे॒वा वाशी॑मन्तम्॥

sa hi kṣemo haviryajñaḥ śruṣṭīdasya gātureti |agniṃ devā vāśīmantam ||

य॒ज्ञा॒साहं॒ दुव॑ इषे॒ऽग्निं पूर्व॑स्य॒ शेव॑स्य ।अद्रे॑: सू॒नुमा॒युमा॑हुः॥

yajñāsāhaṃ duva iṣe'gniṃ pūrvasya śevasya |adre: sūnumāyumāhuḥ ||

नरो॒ ये के चा॒स्मदा विश्वेत्ते वा॒म आ स्यु॑: ।अ॒ग्निं ह॒विषा॒ वर्ध॑न्तः॥

naro ye ke cāsmadā viśvette vāma ā syu: |agniṃ haviṣā vardhantaḥ ||

कृ॒ष्णः श्वे॒तो॑ऽरु॒षो यामो॑ अस्य ब्र॒ध्न ऋ॒ज्र उ॒त शोणो॒ यश॑स्वान् ।हिर॑ण्यरूपं॒ जनि॑ता जजान॥

kṛṣṇaḥ śveto'ruṣo yāmo asya bradhna ṛjra uta śoṇo yaśasvān |hiraṇyarūpaṃ janitā jajāna ||

ए॒वा ते॑ अग्ने विम॒दो म॑नी॒षामूर्जो॑ नपाद॒मृते॑भिः स॒जोषा॑: ।गिर॒ आ व॑क्षत्सुम॒तीरि॑या॒न इष॒मूर्जं॑ सुक्षि॒तिं विश्व॒माभा॑:॥

evā te agne vimado manīṣāmūrjo napādamṛtebhiḥ sajoṣā: |gira ā vakṣatsumatīriyāna iṣamūrjaṃ sukṣitiṃ viśvamābhā: ||