Mandala.Sukta 10.24

ऐन्द्रो विमदः, प्राजापत्यो वा, वासुक्रो वसुकृद्वा। इन्द्रः। ४-६ अश्विनौ। आस्तारपंक्तिः, ४-६ अनुष्टुप्। · aindro vimadaḥ, prājāpatyo vā, vāsukro vasukṛdvā | indraḥ | 4-6 aśvinau | āstārapaṃktiḥ, 4-6 anuṣṭup |

इन्द्र॒ सोम॑मि॒मं पि॑ब॒ मधु॑मन्तं च॒मू सु॒तम् ।अ॒स्मे र॒यिं नि धा॑रय॒ वि वो॒ मदे॑ सह॒स्रिणं॑ पुरूवसो॒ विव॑क्षसे॥

indra somamimaṃ piba madhumantaṃ camū sutam |asme rayiṃ ni dhāraya vi vo made sahasriṇaṃ purūvaso vivakṣase ||

त्वां य॒ज्ञेभि॑रु॒क्थैरुप॑ ह॒व्येभि॑रीमहे ।शची॑पते शचीनां॒ वि वो॒ मदे॒ श्रेष्ठं॑ नो धेहि॒ वार्यं॒ विव॑क्षसे॥

tvāṃ yajñebhirukthairupa havyebhirīmahe |śacīpate śacīnāṃ vi vo made śreṣṭhaṃ no dhehi vāryaṃ vivakṣase ||

यस्पति॒र्वार्या॑णा॒मसि॑ र॒ध्रस्य॑ चोदि॒ता ।इन्द्र॑ स्तोतॄ॒णाम॑वि॒ता वि वो॒ मदे॑ द्वि॒षो न॑: पा॒ह्यंह॑सो॒ विव॑क्षसे॥

yaspatirvāryāṇāmasi radhrasya coditā |indra stotṝṇāmavitā vi vo made dviṣo na: pāhyaṃhaso vivakṣase ||

यु॒वं श॑क्रा माया॒विना॑ समी॒ची निर॑मन्थतम् ।वि॒म॒देन॒ यदी॑ळि॒ता नास॑त्या नि॒रम॑न्थतम्॥

yuvaṃ śakrā māyāvinā samīcī niramanthatam |vimadena yadīḷitā nāsatyā niramanthatam ||

विश्वे॑ दे॒वा अ॑कृपन्त समी॒च्योर्नि॒ष्पत॑न्त्योः ।नास॑त्यावब्रुवन्दे॒वाः पुन॒रा व॑हता॒दिति॑॥

viśve devā akṛpanta samīcyorniṣpatantyoḥ |nāsatyāvabruvandevāḥ punarā vahatāditi ||

मधु॑मन्मे प॒राय॑णं॒ मधु॑म॒त्पुन॒राय॑नम् ।ता नो॑ देवा दे॒वत॑या यु॒वं मधु॑मतस्कृतम्॥

madhumanme parāyaṇaṃ madhumatpunarāyanam |tā no devā devatayā yuvaṃ madhumataskṛtam ||