Mandala.Sukta 10.51

(९) १,३,५,७,९देवाः, २,४,६,८, सौचीकोऽग्निः। २,,४,६,८ देवाः १,३,५,७,९, अग्निः।त्रिष्टुप्। · (9) 1,3,5,7,9devāḥ, 2,4,6,8, saucīko'gniḥ | 2,,4,6,8 devāḥ 1,3,5,7,9, agniḥ |triṣṭup |

म॒हत्तदुल्बं॒ स्थवि॑रं॒ तदा॑सी॒द्येनावि॑ष्टितः प्रवि॒वेशि॑था॒पः ।विश्वा॑ अपश्यद्बहु॒धा ते॑ अग्ने॒ जात॑वेदस्त॒न्वो॑ दे॒व एक॑:॥

mahattadulbaṃ sthaviraṃ tadāsīdyenāviṣṭitaḥ praviveśithāpaḥ |viśvā apaśyadbahudhā te agne jātavedastanvo deva eka: ||

को मा॑ ददर्श कत॒मः स दे॒वो यो मे॑ त॒न्वो॑ बहु॒धा प॒र्यप॑श्यत् ।क्वाह॑ मित्रावरुणा क्षियन्त्य॒ग्नेर्विश्वा॑: स॒मिधो॑ देव॒यानी॑:॥

ko mā dadarśa katamaḥ sa devo yo me tanvo bahudhā paryapaśyat |kvāha mitrāvaruṇā kṣiyantyagnerviśvā: samidho devayānī: ||

ऐच्छा॑म त्वा बहु॒धा जा॑तवेद॒: प्रवि॑ष्टमग्ने अ॒प्स्वोष॑धीषु ।तं त्वा॑ य॒मो अ॑चिकेच्चित्रभानो दशान्तरु॒ष्याद॑ति॒रोच॑मानम्॥

aicchāma tvā bahudhā jātaveda: praviṣṭamagne apsvoṣadhīṣu |taṃ tvā yamo acikeccitrabhāno daśāntaruṣyādatirocamānam ||

हो॒त्राद॒हं व॑रुण॒ बिभ्य॑दायं॒ नेदे॒व मा॑ यु॒नज॒न्नत्र॑ दे॒वाः ।तस्य॑ मे त॒न्वो॑ बहु॒धा निवि॑ष्टा ए॒तमर्थं॒ न चि॑केता॒हम॒ग्निः॥

hotrādahaṃ varuṇa bibhyadāyaṃ nedeva mā yunajannatra devāḥ |tasya me tanvo bahudhā niviṣṭā etamarthaṃ na ciketāhamagniḥ ||

एहि॒ मनु॑र्देव॒युर्य॒ज्ञका॑मोऽरं॒कृत्या॒ तम॑सि क्षेष्यग्ने ।सु॒गान्प॒थः कृ॑णुहि देव॒याना॒न्वह॑ ह॒व्यानि॑ सुमन॒स्यमा॑नः॥

ehi manurdevayuryajñakāmo'raṃkṛtyā tamasi kṣeṣyagne |sugānpathaḥ kṛṇuhi devayānānvaha havyāni sumanasyamānaḥ ||

अ॒ग्नेः पूर्वे॒ भ्रात॑रो॒ अर्थ॑मे॒तं र॒थीवाध्वा॑न॒मन्वाव॑रीवुः ।तस्मा॑द्भि॒या व॑रुण दू॒रमा॑यं गौ॒रो न क्षे॒प्नोर॑विजे॒ ज्याया॑:॥

agneḥ pūrve bhrātaro arthametaṃ rathīvādhvānamanvāvarīvuḥ |tasmādbhiyā varuṇa dūramāyaṃ gauro na kṣepnoravije jyāyā: ||

कु॒र्मस्त॒ आयु॑र॒जरं॒ यद॑ग्ने॒ यथा॑ यु॒क्तो जा॑तवेदो॒ न रिष्या॑: ।अथा॑ वहासि सुमन॒स्यमा॑नो भा॒गं दे॒वेभ्यो॑ ह॒विष॑: सुजात॥

kurmasta āyurajaraṃ yadagne yathā yukto jātavedo na riṣyā: |athā vahāsi sumanasyamāno bhāgaṃ devebhyo haviṣa: sujāta ||

प्र॒या॒जान्मे॑ अनुया॒जाँश्च॒ केव॑ला॒नूर्ज॑स्वन्तं ह॒विषो॑ दत्त भा॒गम् ।घृ॒तं चा॒पां पुरु॑षं॒ चौष॑धीनाम॒ग्नेश्च॑ दी॒र्घमायु॑रस्तु देवाः॥

prayājānme anuyājām̐śca kevalānūrjasvantaṃ haviṣo datta bhāgam |ghṛtaṃ cāpāṃ puruṣaṃ cauṣadhīnāmagneśca dīrghamāyurastu devāḥ ||

तव॑ प्रया॒जा अ॑नुया॒जाश्च॒ केव॑ल॒ ऊर्ज॑स्वन्तो ह॒विष॑: सन्तु भा॒गाः ।तवा॑ग्ने य॒ज्ञो॒३ऽयम॑स्तु॒ सर्व॒स्तुभ्यं॑ नमन्तां प्र॒दिश॒श्चत॑स्रः॥

tava prayājā anuyājāśca kevala ūrjasvanto haviṣa: santu bhāgāḥ |tavāgne yajño3'yamastu sarvastubhyaṃ namantāṃ pradiśaścatasraḥ ||