Mandala.Sukta 10.57

बन्धु: श्रुतबन्धुर्विप्रबन्धुर्गौपायनाः।विश्वेदेवाः। गायत्री। · bandhu: śrutabandhurviprabandhurgaupāyanāḥ |viśvedevāḥ | gāyatrī |

मा प्र गा॑म प॒थो व॒यं मा य॒ज्ञादि॑न्द्र सो॒मिन॑: ।मान्त स्थु॑र्नो॒ अरा॑तयः॥

mā pra gāma patho vayaṃ mā yajñādindra somina: |mānta sthurno arātayaḥ ||

यो य॒ज्ञस्य॑ प्र॒साध॑न॒स्तन्तु॑र्दे॒वेष्वात॑तः ।तमाहु॑तं नशीमहि॥

yo yajñasya prasādhanastanturdeveṣvātataḥ |tamāhutaṃ naśīmahi ||

मनो॒ न्वा हु॑वामहे नाराशं॒सेन॒ सोमे॑न ।पि॒तॄ॒णां च॒ मन्म॑भिः॥

mano nvā huvāmahe nārāśaṃsena somena |pitṝṇāṃ ca manmabhiḥ ||

आ त॑ एतु॒ मन॒: पुन॒: क्रत्वे॒ दक्षा॑य जी॒वसे॑ ।ज्योक्च॒ सूर्यं॑ दृ॒शे॥

ā ta etu mana: puna: kratve dakṣāya jīvase |jyokca sūryaṃ dṛśe ||

पुन॑र्नः पितरो॒ मनो॒ ददा॑तु॒ दैव्यो॒ जन॑: ।जी॒वं व्रातं॑ सचेमहि॥

punarnaḥ pitaro mano dadātu daivyo jana: |jīvaṃ vrātaṃ sacemahi ||

व॒यं सो॑म व्र॒ते तव॒ मन॑स्त॒नूषु॒ बिभ्र॑तः ।प्र॒जाव॑न्तः सचेमहि॥

vayaṃ soma vrate tava manastanūṣu bibhrataḥ |prajāvantaḥ sacemahi ||