Mandala.Sukta 10.59

बन्धु श्रुतबन्धुर्विप्रबन्धुर्गौपायनाः।१-३ निर्ऋतिः,४ निर्ऋतिः सोमश्च, ५-६असुनीतिः, ७ पृथिवी-द्वयन्तरिक्ष-सोम-पूष-पथ्या-स्वस्तयः,८-१० द्यावापृथिवी, १० (पूर्वार्धस्य) इन्द्र- द्यावापृथिव्यः। त्रिष्टुप् , ८ पंक्तिः,९ महापंक्तिः, १० पंक्त्युत्तरा। · bandhu śrutabandhurviprabandhurgaupāyanāḥ |1-3 nirṛtiḥ,4 nirṛtiḥ somaśca, 5-6asunītiḥ, 7 pṛthivī-dvayantarikṣa-soma-pūṣa-pathyā-svastayaḥ,8-10 dyāvāpṛthivī, 10 (pūrvārdhasya) indra- dyāvāpṛthivyaḥ | triṣṭup , 8 paṃktiḥ,9 mahāpaṃktiḥ, 10 paṃktyuttarā |

प्र ता॒र्यायु॑: प्रत॒रं नवी॑य॒: स्थाता॑रेव॒ क्रतु॑मता॒ रथ॑स्य ।अध॒ च्यवा॑न॒ उत्त॑वी॒त्यर्थं॑ परात॒रं सु निॠ॑तिर्जिहीताम्॥

pra tāryāyu: prataraṃ navīya: sthātāreva kratumatā rathasya |adha cyavāna uttavītyarthaṃ parātaraṃ su niṝtirjihītām ||

साम॒न्नु रा॒ये नि॑धि॒मन्न्वन्नं॒ करा॑महे॒ सु पु॑रु॒ध श्रवां॑सि ।ता नो॒ विश्वा॑नि जरि॒ता म॑मत्तु परात॒रं सु निॠ॑तिर्जिहीताम्॥

sāmannu rāye nidhimannvannaṃ karāmahe su purudha śravāṃsi |tā no viśvāni jaritā mamattu parātaraṃ su niṝtirjihītām ||

अ॒भी ष्व१र्यः पौंस्यै॑र्भवेम॒ द्यौर्न भूमिं॑ गि॒रयो॒ नाज्रा॑न् ।ता नो॒ विश्वा॑नि जरि॒ता चि॑केत परात॒रं सु निॠ॑तिर्जिहीताम्॥

abhī ṣva1ryaḥ pauṃsyairbhavema dyaurna bhūmiṃ girayo nājrān |tā no viśvāni jaritā ciketa parātaraṃ su niṝtirjihītām ||

मो षु ण॑: सोम मृ॒त्यवे॒ परा॑ दा॒: पश्ये॑म॒ नु सूर्य॑मु॒च्चर॑न्तम् ।द्युभि॑र्हि॒तो ज॑रि॒मा सू नो॑ अस्तु परात॒रं सु निॠ॑तिर्जिहीताम्॥

mo ṣu ṇa: soma mṛtyave parā dā: paśyema nu sūryamuccarantam |dyubhirhito jarimā sū no astu parātaraṃ su niṝtirjihītām ||

असु॑नीते॒ मनो॑ अ॒स्मासु॑ धारय जी॒वात॑वे॒ सु प्र ति॑रा न॒ आयु॑: ।रा॒र॒न्धि न॒: सूर्य॑स्य सं॒दृशि॑ घृ॒तेन॒ त्वं त॒न्वं॑ वर्धयस्व॥

asunīte mano asmāsu dhāraya jīvātave su pra tirā na āyu: |rārandhi na: sūryasya saṃdṛśi ghṛtena tvaṃ tanvaṃ vardhayasva ||

असु॑नीते॒ पुन॑र॒स्मासु॒ चक्षु॒: पुन॑: प्रा॒णमि॒ह नो॑ धेहि॒ भोग॑म् ।ज्योक्प॑श्येम॒ सूर्य॑मु॒च्चर॑न्त॒मनु॑मते मृ॒ळया॑ नः स्व॒स्ति॥

asunīte punarasmāsu cakṣu: puna: prāṇamiha no dhehi bhogam |jyokpaśyema sūryamuccarantamanumate mṛḷayā naḥ svasti ||

पुन॑र्नो॒ असुं॑ पृथि॒वी द॑दातु॒ पुन॒र्द्यौर्दे॒वी पुन॑र॒न्तरि॑क्षम् ।पुन॑र्न॒: सोम॑स्त॒न्वं॑ ददातु॒ पुन॑: पू॒षा प॒थ्यां॒३ या स्व॒स्तिः॥

punarno asuṃ pṛthivī dadātu punardyaurdevī punarantarikṣam |punarna: somastanvaṃ dadātu puna: pūṣā pathyāṃ3 yā svastiḥ ||

शं रोद॑सी सु॒बन्ध॑वे य॒ह्वी ऋ॒तस्य॑ मा॒तरा॑ ।भर॑ता॒मप॒ यद्रपो॒ द्यौः पृ॑थिवि क्ष॒मा रपो॒ मो षु ते॒ किं च॒नाम॑मत्॥

śaṃ rodasī subandhave yahvī ṛtasya mātarā |bharatāmapa yadrapo dyauḥ pṛthivi kṣamā rapo mo ṣu te kiṃ canāmamat ||

अव॑ द्व॒के अव॑ त्रि॒का दि॒वश्च॑रन्ति भेष॒जा ।क्ष॒मा च॑रि॒ष्ण्वे॑क॒कं भर॑ता॒मप॒ यद्रपो॒ द्यौः पृ॑थिवि क्ष॒मा रपो॒ मो षु ते॒ किं च॒नाम॑मत्॥

ava dvake ava trikā divaścaranti bheṣajā |kṣamā cariṣṇvekakaṃ bharatāmapa yadrapo dyauḥ pṛthivi kṣamā rapo mo ṣu te kiṃ canāmamat ||

समि॑न्द्रेरय॒ गाम॑न॒ड्वाहं॒ य आव॑हदुशी॒नरा॑ण्या॒ अन॑: ।भर॑ता॒मप॒ यद्रपो॒ द्यौः पृ॑थिवि क्ष॒मा रपो॒ मो षु ते॒ किं च॒नाम॑मत्॥

samindreraya gāmanaḍvāhaṃ ya āvahaduśīnarāṇyā ana: |bharatāmapa yadrapo dyauḥ pṛthivi kṣamā rapo mo ṣu te kiṃ canāmamat ||