Mandala.Sukta 10.83

मन्युस्तापसः। मन्युः। त्रिष्टुप् , १ जगती। · manyustāpasaḥ | manyuḥ | triṣṭup , 1 jagatī |

यस्ते॑ म॒न्योऽवि॑धद्वज्र सायक॒ सह॒ ओज॑: पुष्यति॒ विश्व॑मानु॒षक् ।सा॒ह्याम॒ दास॒मार्यं॒ त्वया॑ यु॒जा सह॑स्कृतेन॒ सह॑सा॒ सह॑स्वता ॥१म॒न्युरिन्द्रो॑ म॒न्युरे॒वास॑ दे॒वो म॒न्युर्होता॒ वरु॑णो जा॒तवे॑दाः ।म॒न्युं विश॑ ईळते॒ मानु॑षी॒र्याः पा॒हि नो॑ मन्यो॒ तप॑सा स॒जोषा॑:॥

yaste manyo'vidhadvajra sāyaka saha oja: puṣyati viśvamānuṣak |sāhyāma dāsamāryaṃ tvayā yujā sahaskṛtena sahasā sahasvatā ||1manyurindro manyurevāsa devo manyurhotā varuṇo jātavedāḥ |manyuṃ viśa īḷate mānuṣīryāḥ pāhi no manyo tapasā sajoṣā: ||

अ॒भी॑हि मन्यो त॒वस॒स्तवी॑या॒न्तप॑सा यु॒जा वि ज॑हि॒ शत्रू॑न् ।अ॒मि॒त्र॒हा वृ॑त्र॒हा द॑स्यु॒हा च॒ विश्वा॒ वसू॒न्या भ॑रा॒ त्वं न॑:॥

abhīhi manyo tavasastavīyāntapasā yujā vi jahi śatrūn |amitrahā vṛtrahā dasyuhā ca viśvā vasūnyā bharā tvaṃ na: ||

त्वं हि म॑न्यो अ॒भिभू॑त्योजाः स्वय॒म्भूर्भामो॑ अभिमातिषा॒हः ।वि॒श्वच॑र्षणि॒: सहु॑रि॒: सहा॑वान॒स्मास्वोज॒: पृत॑नासु धेहि॥

tvaṃ hi manyo abhibhūtyojāḥ svayambhūrbhāmo abhimātiṣāhaḥ |viśvacarṣaṇi: sahuri: sahāvānasmāsvoja: pṛtanāsu dhehi ||

अ॒भा॒गः सन्नप॒ परे॑तो अस्मि॒ तव॒ क्रत्वा॑ तवि॒षस्य॑ प्रचेतः ।तं त्वा॑ मन्यो अक्र॒तुर्जि॑हीळा॒हं स्वा त॒नूर्ब॑ल॒देया॑य॒ मेहि॑॥

abhāgaḥ sannapa pareto asmi tava kratvā taviṣasya pracetaḥ |taṃ tvā manyo akraturjihīḷāhaṃ svā tanūrbaladeyāya mehi ||

अ॒यं ते॑ अ॒स्म्युप॒ मेह्य॒र्वाङ्प्र॑तीची॒नः स॑हुरे विश्वधायः ।मन्यो॑ वज्रिन्न॒भि मामा व॑वृत्स्व॒ हना॑व॒ दस्यूँ॑रु॒त बो॑ध्या॒पेः॥

ayaṃ te asmyupa mehyarvāṅpratīcīnaḥ sahure viśvadhāyaḥ |manyo vajrinnabhi māmā vavṛtsva hanāva dasyūm̐ruta bodhyāpeḥ ||

अ॒भि प्रेहि॑ दक्षिण॒तो भ॑वा॒ मेऽधा॑ वृ॒त्राणि॑ जङ्घनाव॒ भूरि॑ ।जु॒होमि॑ ते ध॒रुणं॒ मध्वो॒ अग्र॑मु॒भा उ॑पां॒शु प्र॑थ॒मा पि॑बाव॥

abhi prehi dakṣiṇato bhavā me'dhā vṛtrāṇi jaṅghanāva bhūri |juhomi te dharuṇaṃ madhvo agramubhā upāṃśu prathamā pibāva ||