Mandala.Sukta 2.12

गृत्समद (आङ्गिरसः शौनहोत्रः पश्चाद्) भार्गवः शौनकः। इन्द्रः। त्रिष्टुप्। · gṛtsamada (āṅgirasaḥ śaunahotraḥ paścād) bhārgavaḥ śaunakaḥ | indraḥ | triṣṭup |

यो जा॒त ए॒व प्र॑थ॒मो मन॑स्वान् दे॒वो दे॒वान् क्रतु॑ना प॒र्यभू॑षत् ।यस्य॒ शुष्मा॒द् रोद॑सी॒ अभ्य॑सेतां नृ॒म्णस्य॑ म॒ह्ना स ज॑नास॒ इन्द्र॑:॥

yo jāta eva prathamo manasvān devo devān kratunā paryabhūṣat |yasya śuṣmād rodasī abhyasetāṃ nṛmṇasya mahnā sa janāsa indra: ||

यः पृ॑थि॒वीं व्यथ॑माना॒मदृं॑ह॒द् यः पर्व॑ता॒न् प्रकु॑पिताँ॒ अर॑म्णात् ।यो अ॒न्तरि॑क्षं विम॒मे वरी॑यो॒ यो द्यामस्त॑भ्ना॒त् स ज॑नास॒ इन्द्र॑:॥

yaḥ pṛthivīṃ vyathamānāmadṛṃhad yaḥ parvatān prakupitām̐ aramṇāt |yo antarikṣaṃ vimame varīyo yo dyāmastabhnāt sa janāsa indra: ||

यो ह॒त्वाहि॒मरि॑णात् स॒प्त सिन्धू॒न् यो गा उ॒दाज॑दप॒धा व॒लस्य॑ ।यो अश्म॑नोर॒न्तर॒ग्निं ज॒जान॑ सं॒वृक् स॒मत्सु॒ स ज॑नास॒ इन्द्र॑:॥

yo hatvāhimariṇāt sapta sindhūn yo gā udājadapadhā valasya |yo aśmanorantaragniṃ jajāna saṃvṛk samatsu sa janāsa indra: ||

येने॒मा विश्वा॒ च्यव॑ना कृ॒तानि॒ यो दासं॒ वर्ण॒मध॑रं॒ गुहाक॑: ।श्व॒घ्नीव॒ यो जि॑गी॒वाँ ल॒क्षमाद॑द॒र्यः पु॒ष्टानि॒ स ज॑नास॒ इन्द्र॑:॥

yenemā viśvā cyavanā kṛtāni yo dāsaṃ varṇamadharaṃ guhāka: |śvaghnīva yo jigīvām̐ lakṣamādadaryaḥ puṣṭāni sa janāsa indra: ||

यं स्मा॑ पृ॒च्छन्ति॒ कुह॒ सेति॑ घो॒रमु॒तेमा॑हु॒र्नैषो अ॒स्तीत्ये॑नम् ।सो अ॒र्यः पु॒ष्टीर्विज॑ इ॒वा मि॑नाति॒ श्रद॑स्मै धत्त॒ स ज॑नास॒ इन्द्र॑:॥

yaṃ smā pṛcchanti kuha seti ghoramutemāhurnaiṣo astītyenam |so aryaḥ puṣṭīrvija ivā mināti śradasmai dhatta sa janāsa indra: ||

यो र॒ध्रस्य॑ चोदि॒ता यः कृ॒शस्य॒ यो ब्र॒ह्मणो॒ नाध॑मानस्य की॒रेः ।यु॒क्तग्रा॑व्णो॒ योऽवि॒ता सु॑शि॒प्रः सु॒तसो॑मस्य॒ स ज॑नास॒ इन्द्र॑:॥

yo radhrasya coditā yaḥ kṛśasya yo brahmaṇo nādhamānasya kīreḥ |yuktagrāvṇo yo'vitā suśipraḥ sutasomasya sa janāsa indra: ||

यस्याश्वा॑सः प्र॒दिशि॒ यस्य॒ गावो॒ यस्य॒ ग्रामा॒ यस्य॒ विश्वे॒ रथा॑सः ।यः सूर्यं॒ य उ॒षसं॑ ज॒जान॒ यो अ॒पां ने॒ता स ज॑नास॒ इन्द्र॑:॥

yasyāśvāsaḥ pradiśi yasya gāvo yasya grāmā yasya viśve rathāsaḥ |yaḥ sūryaṃ ya uṣasaṃ jajāna yo apāṃ netā sa janāsa indra: ||

यं क्रन्द॑सी संय॒ती वि॒ह्वये॑ते॒ परेऽव॑र उ॒भया॑ अ॒मित्रा॑: ।स॒मा॒नं चि॒द् रथ॑मातस्थि॒वांसा॒ नाना॑ हवेते॒ स ज॑नास॒ इन्द्र॑:॥

yaṃ krandasī saṃyatī vihvayete pare'vara ubhayā amitrā: |samānaṃ cid rathamātasthivāṃsā nānā havete sa janāsa indra: ||

यस्मा॒न्न ऋ॒ते वि॒जय॑न्ते॒ जना॑सो॒ यं युध्य॑माना॒ अव॑से॒ हव॑न्ते ।यो विश्व॑स्य प्रति॒मानं॑ ब॒भूव॒ यो अ॑च्युत॒च्युत् स ज॑नास॒ इन्द्र॑:॥

yasmānna ṛte vijayante janāso yaṃ yudhyamānā avase havante |yo viśvasya pratimānaṃ babhūva yo acyutacyut sa janāsa indra: ||

यः शश्व॑तो॒ मह्येनो॒ दधा॑ना॒नम॑न्यमाना॒ञ्छर्वा॑ ज॒घान॑ ।यः शर्ध॑ते॒ नानु॒ददा॑ति शृ॒ध्यां यो दस्यो॑र्ह॒न्ता स ज॑नास॒ इन्द्र॑:॥

yaḥ śaśvato mahyeno dadhānānamanyamānāñcharvā jaghāna |yaḥ śardhate nānudadāti śṛdhyāṃ yo dasyorhantā sa janāsa indra: ||

यः शम्ब॑रं॒ पर्व॑तेषु क्षि॒यन्तं॑ चत्वारिं॒श्यां श॒रद्य॒न्ववि॑न्दत् ।ओ॒जा॒यमा॑नं॒ यो अहिं॑ ज॒घान॒ दानुं॒ शया॑नं॒ स ज॑नास॒ इन्द्र॑:॥

yaḥ śambaraṃ parvateṣu kṣiyantaṃ catvāriṃśyāṃ śaradyanvavindat |ojāyamānaṃ yo ahiṃ jaghāna dānuṃ śayānaṃ sa janāsa indra: ||

यः स॒प्तर॑श्मिर्वृष॒भस्तुवि॑ष्मान॒वासृ॑ज॒त् सर्त॑वे स॒प्त सिन्धू॑न् ।यो रौ॑हि॒णमस्फु॑र॒द् वज्र॑बाहु॒र्द्यामा॒रोह॑न्तं॒ स ज॑नास॒ इन्द्र॑:॥

yaḥ saptaraśmirvṛṣabhastuviṣmānavāsṛjat sartave sapta sindhūn |yo rauhiṇamasphurad vajrabāhurdyāmārohantaṃ sa janāsa indra: ||

द्यावा॑ चिदस्मै पृथि॒वी न॑मेते॒ शुष्मा॑च्चिदस्य॒ पर्व॑ता भयन्ते ।यः सो॑म॒पा नि॑चि॒तो वज्र॑बाहु॒र्यो वज्र॑हस्त॒: स ज॑नास॒ इन्द्र॑:॥

dyāvā cidasmai pṛthivī namete śuṣmāccidasya parvatā bhayante |yaḥ somapā nicito vajrabāhuryo vajrahasta: sa janāsa indra: ||

यः सु॒न्वन्त॒मव॑ति॒ यः पच॑न्तं॒ यः शंस॑न्तं॒ यः श॑शमा॒नमू॒ती ।यस्य॒ ब्रह्म॒ वर्ध॑नं॒ यस्य॒ सोमो॒ यस्ये॒दं राध॒: स ज॑नास॒ इन्द्र॑:॥

yaḥ sunvantamavati yaḥ pacantaṃ yaḥ śaṃsantaṃ yaḥ śaśamānamūtī |yasya brahma vardhanaṃ yasya somo yasyedaṃ rādha: sa janāsa indra: ||

यः सु॑न्व॒ते पच॑ते दु॒ध्र आ चि॒द् वाजं॒ दर्द॑र्षि॒ स किला॑सि स॒त्यः ।व॒यं त॑ इन्द्र वि॒श्वह॑ प्रि॒यास॑: सु॒वीरा॑सो वि॒दथ॒मा व॑देम॥

yaḥ sunvate pacate dudhra ā cid vājaṃ dardarṣi sa kilāsi satyaḥ |vayaṃ ta indra viśvaha priyāsa: suvīrāso vidathamā vadema ||