Mandala.Sukta 3.10

गाथिनो विश्वामित्रः। अग्निः। उष्णिक्। · gāthino viśvāmitraḥ | agniḥ | uṣṇik |

त्वाम॑ग्ने मनी॒षिण॑: स॒म्राजं॑ चर्षणी॒नाम् ।दे॒वं मर्ता॑स इन्धते॒ सम॑ध्व॒रे॥

tvāmagne manīṣiṇa: samrājaṃ carṣaṇīnām |devaṃ martāsa indhate samadhvare ||

त्वां य॒ज्ञेष्वृ॒त्विज॒मग्ने॒ होता॑रमीळते ।गो॒पा ऋ॒तस्य॑ दीदिहि॒ स्वे दमे॑॥

tvāṃ yajñeṣvṛtvijamagne hotāramīḷate |gopā ṛtasya dīdihi sve dame ||

स घा॒ यस्ते॒ ददा॑शति स॒मिधा॑ जा॒तवे॑दसे ।सो अ॑ग्ने धत्ते सु॒वीर्यं॒ स पु॑ष्यति॥

sa ghā yaste dadāśati samidhā jātavedase |so agne dhatte suvīryaṃ sa puṣyati ||

स के॒तुर॑ध्व॒राणा॑म॒ग्निर्दे॒वेभि॒रा ग॑मत् ।अ॒ञ्जा॒नः स॒प्त होतृ॑भिर्ह॒विष्म॑ते॥

sa keturadhvarāṇāmagnirdevebhirā gamat |añjānaḥ sapta hotṛbhirhaviṣmate ||

प्र होत्रे॑ पू॒र्व्यं वचो॒ऽग्नये॑ भरता बृ॒हत् ।वि॒पां ज्योतीं॑षि॒ बिभ्र॑ते॒ न वे॒धसे॑॥

pra hotre pūrvyaṃ vaco'gnaye bharatā bṛhat |vipāṃ jyotīṃṣi bibhrate na vedhase ||

अ॒ग्निं व॑र्धन्तु नो॒ गिरो॒ यतो॒ जाय॑त उ॒क्थ्य॑: ।म॒हे वाजा॑य॒ द्रवि॑णाय दर्श॒तः॥

agniṃ vardhantu no giro yato jāyata ukthya: |mahe vājāya draviṇāya darśataḥ ||

अग्ने॒ यजि॑ष्ठो अध्व॒रे दे॒वान् दे॑वय॒ते य॑ज ।होता॑ म॒न्द्रो वि रा॑ज॒स्यति॒ स्रिध॑:॥

agne yajiṣṭho adhvare devān devayate yaja |hotā mandro vi rājasyati sridha: ||

स न॑: पावक दीदिहि द्यु॒मद॒स्मे सु॒वीर्य॑म् ।भवा॑ स्तो॒तृभ्यो॒ अन्त॑मः स्व॒स्तये॑॥

sa na: pāvaka dīdihi dyumadasme suvīryam |bhavā stotṛbhyo antamaḥ svastaye ||

तं त्वा॒ विप्रा॑ विप॒न्यवो॑ जागृ॒वांस॒: समि॑न्धते ।ह॒व्य॒वाह॒मम॑र्त्यं सहो॒वृध॑म्॥

taṃ tvā viprā vipanyavo jāgṛvāṃsa: samindhate |havyavāhamamartyaṃ sahovṛdham ||