Mandala.Sukta 3.16

कात्य उत्कीलः। अग्निः। प्रगाथः(१, ३, ५ बृहती, २, ४, ६ सतो बृहती)। · kātya utkīlaḥ | agniḥ | pragāthaḥ(1, 3, 5 bṛhatī, 2, 4, 6 sato bṛhatī) |

अ॒यम॒ग्निः सु॒वीर्य॒स्येशे॑ म॒हः सौभ॑गस्य ।रा॒य ई॑शे स्वप॒त्यस्य॒ गोम॑त॒ ईशे॑ वृत्र॒हथा॑नाम्॥

ayamagniḥ suvīryasyeśe mahaḥ saubhagasya |rāya īśe svapatyasya gomata īśe vṛtrahathānām ||

इ॒मं न॑रो मरुतः सश्चता॒ वृधं॒ यस्मि॒न् राय॒: शेवृ॑धासः ।अ॒भि ये सन्ति॒ पृत॑नासु दू॒ढ्यो॑ वि॒श्वाहा॒ शत्रु॑माद॒भुः॥

imaṃ naro marutaḥ saścatā vṛdhaṃ yasmin rāya: śevṛdhāsaḥ |abhi ye santi pṛtanāsu dūḍhyo viśvāhā śatrumādabhuḥ ||

स त्वं नो॑ रा॒यः शि॑शीहि॒ मीढ्वो॑ अग्ने सु॒वीर्य॑स्य ।तुवि॑द्युम्न॒ वर्षि॑ष्ठस्य प्र॒जाव॑तोऽनमी॒वस्य॑ शु॒ष्मिण॑:॥

sa tvaṃ no rāyaḥ śiśīhi mīḍhvo agne suvīryasya |tuvidyumna varṣiṣṭhasya prajāvato'namīvasya śuṣmiṇa: ||

चक्रि॒र्यो विश्वा॒ भुव॑ना॒भि सा॑स॒हिश्चक्रि॑र्दे॒वेष्वा दुव॑: ।आ दे॒वेषु॒ यत॑त॒ आ सु॒वीर्य॒ आ शंस॑ उ॒त नृ॒णाम्॥

cakriryo viśvā bhuvanābhi sāsahiścakrirdeveṣvā duva: |ā deveṣu yatata ā suvīrya ā śaṃsa uta nṛṇām ||

मा नो॑ अ॒ग्नेऽम॑तये॒ मावीर॑तायै रीरधः ।मागोता॑यै सहसस्पुत्र॒ मा नि॒देऽप॒ द्वेषां॒स्या कृ॑धि॥

mā no agne'mataye māvīratāyai rīradhaḥ |māgotāyai sahasasputra mā nide'pa dveṣāṃsyā kṛdhi ||

श॒ग्धि वाज॑स्य सुभग प्र॒जाव॒तोऽग्ने॑ बृह॒तो अ॑ध्व॒रे ।सं रा॒या भूय॑सा सृज मयो॒भुना॒ तुवि॑द्युम्न॒ यश॑स्वता॥

śagdhi vājasya subhaga prajāvato'gne bṛhato adhvare |saṃ rāyā bhūyasā sṛja mayobhunā tuvidyumna yaśasvatā ||