Mandala.Sukta 3.19

गाथी कौशिकः। अग्निः। त्रिष्टुप्। · gāthī kauśikaḥ | agniḥ | triṣṭup |

अ॒ग्निं होता॑रं॒ प्र वृ॑णे मि॒येधे॒ गृत्सं॑ क॒विं वि॑श्व॒विद॒ममू॑रम् ।स नो॑ यक्षद् दे॒वता॑ता॒ यजी॑यान् रा॒ये वाजा॑य वनते म॒घानि॑॥

agniṃ hotāraṃ pra vṛṇe miyedhe gṛtsaṃ kaviṃ viśvavidamamūram |sa no yakṣad devatātā yajīyān rāye vājāya vanate maghāni ||

प्र ते॑ अग्ने ह॒विष्म॑तीमिय॒र्म्यच्छा॑ सुद्यु॒म्नां रा॒तिनीं॑ घृ॒ताची॑म् ।प्र॒द॒क्षि॒णिद् दे॒वता॑तिमुरा॒णः सं रा॒तिभि॒र्वसु॑भिर्य॒ज्ञम॑श्रेत्॥

pra te agne haviṣmatīmiyarmyacchā sudyumnāṃ rātinīṃ ghṛtācīm |pradakṣiṇid devatātimurāṇaḥ saṃ rātibhirvasubhiryajñamaśret ||

स तेजी॑यसा॒ मन॑सा॒ त्वोत॑ उ॒त शि॑क्ष स्वप॒त्यस्य॑ शि॒क्षोः ।अग्ने॑ रा॒यो नृत॑मस्य॒ प्रभू॑तौ भू॒याम॑ ते सुष्टु॒तय॑श्च॒ वस्व॑:॥

sa tejīyasā manasā tvota uta śikṣa svapatyasya śikṣoḥ |agne rāyo nṛtamasya prabhūtau bhūyāma te suṣṭutayaśca vasva: ||

भूरी॑णि॒ हि त्वे द॑धि॒रे अनी॒का ऽग्ने॑ दे॒वस्य॒ यज्य॑वो॒ जना॑सः ।स आ व॑ह दे॒वता॑तिं यविष्ठ॒ शर्धो॒ यद॒द्य दि॒व्यं यजा॑सि॥

bhūrīṇi hi tve dadhire anīkā 'gne devasya yajyavo janāsaḥ |sa ā vaha devatātiṃ yaviṣṭha śardho yadadya divyaṃ yajāsi ||

यत् त्वा॒ होता॑रम॒नज॑न् मि॒येधे॑ निषा॒दय॑न्तो य॒जथा॑य दे॒वाः ।स त्वं नो॑ अग्नेऽवि॒तेह बो॒ध्यधि॒ श्रवां॑सि धेहि नस्त॒नूषु॑॥

yat tvā hotāramanajan miyedhe niṣādayanto yajathāya devāḥ |sa tvaṃ no agne'viteha bodhyadhi śravāṃsi dhehi nastanūṣu ||