Mandala.Sukta 3.59

गाथिनो विश्वामित्रः। मित्रः। त्रिष्टुप्, ६-९ गायत्री। · gāthino viśvāmitraḥ | mitraḥ | triṣṭup, 6-9 gāyatrī |

मि॒त्रो जना॑न् यातयति ब्रुवा॒णो मि॒त्रो दा॑धार पृथि॒वीमु॒त द्याम् ।मि॒त्रः कृ॒ष्टीरनि॑मिषा॒भि च॑ष्टे मि॒त्राय॑ ह॒व्यं घृ॒तव॑ज्जुहोत॥

mitro janān yātayati bruvāṇo mitro dādhāra pṛthivīmuta dyām |mitraḥ kṛṣṭīranimiṣābhi caṣṭe mitrāya havyaṃ ghṛtavajjuhota ||

प्र स मि॑त्र॒ मर्तो॑ अस्तु॒ प्रय॑स्वा॒न् यस्त॑ आदित्य॒ शिक्ष॑ति व्र॒तेन॑ ।न ह॑न्यते॒ न जी॑यते॒ त्वोतो॒ नैन॒मंहो॑ अश्नो॒त्यन्ति॑तो॒ न दू॒रात्॥

pra sa mitra marto astu prayasvān yasta āditya śikṣati vratena |na hanyate na jīyate tvoto nainamaṃho aśnotyantito na dūrāt ||

अ॒न॒मी॒वास॒ इळ॑या॒ मद॑न्तो मि॒तज्ञ॑वो॒ वरि॑म॒न्ना पृ॑थि॒व्याः ।आ॒दि॒त्यस्य॑ व्र॒तमु॑पक्षि॒यन्तो॑ व॒यं मि॒त्रस्य॑ सुम॒तौ स्या॑म॥

anamīvāsa iḷayā madanto mitajñavo varimannā pṛthivyāḥ |ādityasya vratamupakṣiyanto vayaṃ mitrasya sumatau syāma ||

अ॒यं मि॒त्रो न॑म॒स्य॑: सु॒शेवो॒ राजा॑ सुक्ष॒त्रो अ॑जनिष्ट वे॒धाः ।तस्य॑ व॒यं सु॑म॒तौ य॒ज्ञिय॒स्याऽपि॑ भ॒द्रे सौ॑मन॒से स्या॑म॥

ayaṃ mitro namasya: suśevo rājā sukṣatro ajaniṣṭa vedhāḥ |tasya vayaṃ sumatau yajñiyasyā'pi bhadre saumanase syāma ||

म॒हाँ आ॑दि॒त्यो नम॑सोप॒सद्यो॑ यात॒यज्ज॑नो गृण॒ते सु॒शेव॑: ।तस्मा॑ ए॒तत्पन्य॑तमाय॒ जुष्ट॑म॒ग्नौ मि॒त्राय॑ ह॒विरा जु॑होत॥

mahām̐ ādityo namasopasadyo yātayajjano gṛṇate suśeva: |tasmā etatpanyatamāya juṣṭamagnau mitrāya havirā juhota ||

मि॒त्रस्य॑ चर्षणी॒धृतोऽवो॑ दे॒वस्य॑ सान॒सि ।द्यु॒म्नं चि॒त्रश्र॑वस्तमम्॥

mitrasya carṣaṇīdhṛto'vo devasya sānasi |dyumnaṃ citraśravastamam ||

अ॒भि यो म॑हि॒ना दिवं॑ मि॒त्रो ब॒भूव॑ स॒प्रथा॑: ।अ॒भि श्रवो॑भिः पृथि॒वीम्॥

abhi yo mahinā divaṃ mitro babhūva saprathā: |abhi śravobhiḥ pṛthivīm ||

मि॒त्राय॒ पञ्च॑ येमिरे॒ जना॑ अ॒भिष्टि॑शवसे ।स दे॒वान् विश्वा॑न् बिभर्ति॥

mitrāya pañca yemire janā abhiṣṭiśavase |sa devān viśvān bibharti ||

मि॒त्रो दे॒वेष्वा॒युषु॒ जना॑य वृ॒क्तब॑र्हिषे ।इष॑ इ॒ष्टव्र॑ता अकः॥

mitro deveṣvāyuṣu janāya vṛktabarhiṣe |iṣa iṣṭavratā akaḥ ||