Mandala.Sukta 4.31

वामदेवो गौतमः। इन्द्रः। गायत्री, ३ पाद निचृत्। · vāmadevo gautamaḥ | indraḥ | gāyatrī, 3 pāda nicṛt |

कया॑ नश्चि॒त्र आ भु॑वदू॒ती स॒दावृ॑ध॒: सखा॑ ।कया॒ शचि॑ष्ठया वृ॒ता॥

kayā naścitra ā bhuvadūtī sadāvṛdha: sakhā |kayā śaciṣṭhayā vṛtā ||

कस्त्वा॑ स॒त्यो मदा॑नां॒ मंहि॑ष्ठो मत्स॒दन्ध॑सः ।दृ॒ळहा चि॑दा॒रुजे॒ वसु॑॥

kastvā satyo madānāṃ maṃhiṣṭho matsadandhasaḥ |dṛḷahā cidāruje vasu ||

अ॒भी षु ण॒: सखी॑नामवि॒ता ज॑रितॄ॒णाम् ।श॒तं भ॑वास्यू॒तिभि॑:॥

abhī ṣu ṇa: sakhīnāmavitā jaritṝṇām |śataṃ bhavāsyūtibhi: ||

अ॒भी न॒ आ व॑वृत्स्व च॒क्रं न वृ॒त्तमर्व॑तः ।नि॒युद्भि॑श्चर्षणी॒नाम्॥

abhī na ā vavṛtsva cakraṃ na vṛttamarvataḥ |niyudbhiścarṣaṇīnām ||

प्र॒वता॒ हि क्रतू॑ना॒मा हा॑ प॒देव॒ गच्छ॑सि ।अभ॑क्षि॒ सूर्ये॒ सचा॑॥

pravatā hi kratūnāmā hā padeva gacchasi |abhakṣi sūrye sacā ||

सं यत्त॑ इन्द्र म॒न्यव॒: सं च॒क्राणि॑ दधन्वि॒रे ।अध॒ त्वे अध॒ सूर्ये॑॥

saṃ yatta indra manyava: saṃ cakrāṇi dadhanvire |adha tve adha sūrye ||

उ॒त स्मा॒ हि त्वामा॒हुरिन्म॒घवा॑नं शचीपते ।दाता॑र॒मवि॑दीधयुम्॥

uta smā hi tvāmāhurinmaghavānaṃ śacīpate |dātāramavidīdhayum ||

उ॒त स्मा॑ स॒द्य इत् परि॑ शशमा॒नाय॑ सुन्व॒ते ।पु॒रू चि॑न्मंहसे॒ वसु॑॥

uta smā sadya it pari śaśamānāya sunvate |purū cinmaṃhase vasu ||

न॒हि ष्मा॑ ते श॒तं च॒न राधो॒ वर॑न्त आ॒मुर॑: ।न च्यौ॒त्नानि॑ करिष्य॒तः॥

nahi ṣmā te śataṃ cana rādho varanta āmura: |na cyautnāni kariṣyataḥ ||

अ॒स्माँ अ॑वन्तु ते श॒तम॒स्मान् त्स॒हस्र॑मू॒तय॑: ।अ॒स्मान् विश्वा॑ अ॒भिष्ट॑यः॥

asmām̐ avantu te śatamasmān tsahasramūtaya: |asmān viśvā abhiṣṭayaḥ ||

अ॒स्माँ इ॒हा वृ॑णीष्व स॒ख्याय॑ स्व॒स्तये॑ ।म॒हो रा॒ये दि॒वित्म॑ते॥

asmām̐ ihā vṛṇīṣva sakhyāya svastaye |maho rāye divitmate ||

अ॒स्माँ अ॑विड्ढि वि॒श्वहेन्द्र॑ रा॒या परी॑णसा ।अ॒स्मान् विश्वा॑भिरू॒तिभि॑:॥

asmām̐ aviḍḍhi viśvahendra rāyā parīṇasā |asmān viśvābhirūtibhi: ||

अ॒स्मभ्यं॒ ताँ अपा॑ वृधि व्र॒जाँ अस्ते॑व॒ गोम॑तः ।नवा॑भिरिन्द्रो॒तिभि॑:॥

asmabhyaṃ tām̐ apā vṛdhi vrajām̐ asteva gomataḥ |navābhirindrotibhi: ||

अ॒स्माकं॑ धृष्णु॒या रथो॑ द्यु॒माँ इ॒न्द्रान॑पच्युतः ।ग॒व्युर॑श्व॒युरी॑यते॥

asmākaṃ dhṛṣṇuyā ratho dyumām̐ indrānapacyutaḥ |gavyuraśvayurīyate ||

अ॒स्माक॑मुत्त॒मं कृ॑धि॒ श्रवो॑ दे॒वेषु॑ सूर्य ।वर्षि॑ष्ठं॒ द्यामि॑वो॒परि॑॥

asmākamuttamaṃ kṛdhi śravo deveṣu sūrya |varṣiṣṭhaṃ dyāmivopari ||