Mandala.Sukta 4.40

वामदेवो गौतमः। दधिक्राः, ५ सूर्यः।जगती, १ त्रिष्टुप्। · vāmadevo gautamaḥ | dadhikrāḥ, 5 sūryaḥ |jagatī, 1 triṣṭup |

द॒धि॒क्राव्ण॒ इदु॒ नु च॑र्किराम॒ विश्वा॒ इन्मामु॒षस॑: सूदयन्तु ।अ॒पाम॒ग्नेरु॒षस॒: सूर्य॑स्य॒ बृह॒स्पते॑राङ्गिर॒सस्य॑ जि॒ष्णोः॥

dadhikrāvṇa idu nu carkirāma viśvā inmāmuṣasa: sūdayantu |apāmagneruṣasa: sūryasya bṛhaspaterāṅgirasasya jiṣṇoḥ ||

सत्वा॑ भरि॒षो ग॑वि॒षो दु॑वन्य॒सच्छ्र॑व॒स्यादि॒ष उ॒षस॑स्तुरण्य॒सत् ।स॒त्यो द्र॒वो द्र॑व॒रः प॑तंग॒रो द॑धि॒क्रावेष॒मूर्जं॒ स्व॑र्जनत्॥

satvā bhariṣo gaviṣo duvanyasacchravasyādiṣa uṣasasturaṇyasat |satyo dravo dravaraḥ pataṃgaro dadhikrāveṣamūrjaṃ svarjanat ||

उ॒त स्मा॑स्य॒ द्रव॑तस्तुरण्य॒तः प॒र्णं न वेरनु॑ वाति प्रग॒र्धिन॑: ।श्ये॒नस्ये॑व॒ ध्रज॑तो अङ्क॒सं परि॑ दधि॒क्राव्ण॑: स॒होर्जा तरि॑त्रतः॥

uta smāsya dravatasturaṇyataḥ parṇaṃ na veranu vāti pragardhina: |śyenasyeva dhrajato aṅkasaṃ pari dadhikrāvṇa: sahorjā taritrataḥ ||

उ॒त स्य वा॒जी क्षि॑प॒णिं तु॑रण्यति ग्री॒वायां॑ ब॒द्धो अ॑पिक॒क्ष आ॒सनि॑ ।क्रतुं॑ दधि॒क्रा अनु॑ सं॒तवी॑त्वत् प॒थामङ्कां॒स्यन्वा॒पनी॑फणत्॥

uta sya vājī kṣipaṇiṃ turaṇyati grīvāyāṃ baddho apikakṣa āsani |kratuṃ dadhikrā anu saṃtavītvat pathāmaṅkāṃsyanvāpanīphaṇat ||

हं॒सः शु॑चि॒षद् वसु॑रन्तरिक्ष॒सद्धोता॑ वेदि॒षदति॑थिर्दुरोण॒सत् ।नृ॒षद्व॑र॒सदृ॑त॒सद् व्यो॑म॒सद॒ब्जा गो॒जा ऋ॑त॒जा अ॑द्रि॒जा ऋ॒तम्॥

haṃsaḥ śuciṣad vasurantarikṣasaddhotā vediṣadatithirduroṇasat |nṛṣadvarasadṛtasad vyomasadabjā gojā ṛtajā adrijā ṛtam ||