Mandala.Sukta 4.46

वामदेवो गौतमः। इन्द्रवायू, १ वायुः। गायत्री। · vāmadevo gautamaḥ | indravāyū, 1 vāyuḥ | gāyatrī |

अग्रं॑ पिबा॒ मधू॑नां सु॒तं वा॑यो॒ दिवि॑ष्टिषु ।त्वं हि पू॑र्व॒पा असि॑॥

agraṃ pibā madhūnāṃ sutaṃ vāyo diviṣṭiṣu |tvaṃ hi pūrvapā asi ||

श॒तेना॑ नो अ॒भिष्टि॑भिर्नि॒युत्वाँ॒ इन्द्र॑सारथिः ।वायो॑ सु॒तस्य॑ तृम्पतम्॥

śatenā no abhiṣṭibhirniyutvām̐ indrasārathiḥ |vāyo sutasya tṛmpatam ||

आ वां॑ स॒हस्रं॒ हर॑य॒ इन्द्र॑वायू अ॒भि प्रय॑: ।वह॑न्तु॒ सोम॑पीतये॥

ā vāṃ sahasraṃ haraya indravāyū abhi praya: |vahantu somapītaye ||

रथं॒ हिर॑ण्यवन्धुर॒मिन्द्र॑वायू स्वध्व॒रम् ।आ हि स्थाथो॑ दिवि॒स्पृश॑म्॥

rathaṃ hiraṇyavandhuramindravāyū svadhvaram |ā hi sthātho divispṛśam ||

रथे॑न पृथु॒पाज॑सा दा॒श्वांस॒मुप॑ गच्छतम् ।इन्द्र॑वायू इ॒हा ग॑तम्॥

rathena pṛthupājasā dāśvāṃsamupa gacchatam |indravāyū ihā gatam ||

इन्द्र॑वायू अ॒यं सु॒तस्तं दे॒वेभि॑: स॒जोष॑सा ।पिब॑तं दा॒शुषो॑ गृ॒हे॥

indravāyū ayaṃ sutastaṃ devebhi: sajoṣasā |pibataṃ dāśuṣo gṛhe ||

इ॒ह प्र॒याण॑मस्तु वा॒मिन्द्र॑वायू वि॒मोच॑नम् ।इ॒ह वां॒ सोम॑पीतये॥

iha prayāṇamastu vāmindravāyū vimocanam |iha vāṃ somapītaye ||