Mandala.Sukta 4.52

वामदेवो गौतमः। उषाः। गायत्री। · vāmadevo gautamaḥ | uṣāḥ | gāyatrī |

प्रति॒ ष्या सू॒नरी॒ जनी॑ व्यु॒च्छन्ती॒ परि॒ स्वसु॑: ।दि॒वो अ॑दर्शि दुहि॒ता॥

prati ṣyā sūnarī janī vyucchantī pari svasu: |divo adarśi duhitā ||

अश्वे॑व चि॒त्रारु॑षी मा॒ता गवा॑मृ॒ताव॑री ।सखा॑भूद॒श्विनो॑रु॒षाः॥

aśveva citrāruṣī mātā gavāmṛtāvarī |sakhābhūdaśvinoruṣāḥ ||

उ॒त सखा॑स्य॒श्विनो॑रु॒त मा॒ता गवा॑मसि ।उ॒तोषो॒ वस्व॑ ईशिषे॥

uta sakhāsyaśvinoruta mātā gavāmasi |utoṣo vasva īśiṣe ||

या॒व॒यद्द्वे॑षसं त्वा चिकि॒त्वित् सू॑नृतावरि ।प्रति॒ स्तोमै॑रभुत्स्महि॥

yāvayaddveṣasaṃ tvā cikitvit sūnṛtāvari |prati stomairabhutsmahi ||

प्रति॑ भ॒द्रा अ॑दृक्षत॒ गवां॒ सर्गा॒ न र॒श्मय॑: ।ओषा अ॑प्रा उ॒रु ज्रय॑:॥

prati bhadrā adṛkṣata gavāṃ sargā na raśmaya: |oṣā aprā uru jraya: ||

आ॒प॒प्रुषी॑ विभावरि॒ व्या॑व॒र्ज्योति॑षा॒ तम॑: ।उषो॒ अनु॑ स्व॒धाम॑व॥

āpapruṣī vibhāvari vyāvarjyotiṣā tama: |uṣo anu svadhāmava ||

आ द्यां त॑नोषि र॒श्मिभि॒रान्तरि॑क्षमु॒रु प्रि॒यम् ।उष॑: शु॒क्रेण॑ शो॒चिषा॑॥

ā dyāṃ tanoṣi raśmibhirāntarikṣamuru priyam |uṣa: śukreṇa śociṣā ||