Mandala.Sukta 4.57

वामदेवो गौतमः। १-३ क्षेत्रपतिः, ४ शुनः, ५, ८ शुनासीरौ, ६-७ सीता। अनुष्टुप्, ५ पुर उष्णिक्, २, ३, ८ त्रिष्टुप्। · vāmadevo gautamaḥ | 1-3 kṣetrapatiḥ, 4 śunaḥ, 5, 8 śunāsīrau, 6-7 sītā | anuṣṭup, 5 pura uṣṇik, 2, 3, 8 triṣṭup |

क्षेत्र॑स्य॒ पति॑ना व॒यं हि॒तेने॑व जयामसि ।गामश्वं॑ पोषयि॒त्न्वा स नो॑ मृळाती॒दृशे॑॥

kṣetrasya patinā vayaṃ hiteneva jayāmasi |gāmaśvaṃ poṣayitnvā sa no mṛḷātīdṛśe ||

क्षेत्र॑स्य पते॒ मधु॑मन्तमू॒र्मिं धे॒नुरि॑व॒ पयो॑ अ॒स्मासु॑ धुक्ष्व ।म॒धु॒श्चुतं॑ घृ॒तमि॑व॒ सुपू॑तमृ॒तस्य॑ न॒: पत॑यो मृळयन्तु॥

kṣetrasya pate madhumantamūrmiṃ dhenuriva payo asmāsu dhukṣva |madhuścutaṃ ghṛtamiva supūtamṛtasya na: patayo mṛḷayantu ||

मधु॑मती॒रोष॑धी॒र्द्याव॒ आपो॒ मधु॑मन्नो भवत्व॒न्तरि॑क्षम् ।क्षेत्र॑स्य॒ पति॒र्मधु॑मान् नो अ॒स्त्वरि॑ष्यन्तो॒ अन्वे॑नं चरेम॥

madhumatīroṣadhīrdyāva āpo madhumanno bhavatvantarikṣam |kṣetrasya patirmadhumān no astvariṣyanto anvenaṃ carema ||

शु॒नं वा॒हाः शु॒नं नर॑: शु॒नं कृ॑षतु॒ लाङ्ग॑लम् ।शु॒नं व॑र॒त्रा ब॑ध्यन्तां शु॒नमष्ट्रा॒मुदि॑ङ्गय॥

śunaṃ vāhāḥ śunaṃ nara: śunaṃ kṛṣatu lāṅgalam |śunaṃ varatrā badhyantāṃ śunamaṣṭrāmudiṅgaya ||

शुना॑सीरावि॒मां वाचं॑ जुषेथां॒ यद् दि॒वि च॒क्रथु॒: पय॑: ।तेने॒मामुप॑ सिञ्चतम्॥

śunāsīrāvimāṃ vācaṃ juṣethāṃ yad divi cakrathu: paya: |tenemāmupa siñcatam ||

अ॒र्वाची॑ सुभगे भव॒ सीते॒ वन्दा॑महे त्वा ।यथा॑ नः सु॒भगास॑सि॒ यथा॑ नः सु॒फलास॑सि॥

arvācī subhage bhava sīte vandāmahe tvā |yathā naḥ subhagāsasi yathā naḥ suphalāsasi ||

इन्द्र॒: सीतां॒ नि गृ॑ह्णातु॒ तां पू॒षानु॑ यच्छतु ।सा न॒: पय॑स्वती दुहा॒मुत्त॑रामुत्तरां॒ समा॑म्॥

indra: sītāṃ ni gṛhṇātu tāṃ pūṣānu yacchatu |sā na: payasvatī duhāmuttarāmuttarāṃ samām ||

शु॒नं न॒: फाला॒ वि कृ॑षन्तु॒ भूमिं॑ शु॒नं की॒नाशा॑ अ॒भि य॑न्तु वा॒हैः ।शु॒नं प॒र्जन्यो॒ मधु॑ना॒ पयो॑भि॒: शुना॑सीरा शु॒नम॒स्मासु॑ धत्तम्॥

śunaṃ na: phālā vi kṛṣantu bhūmiṃ śunaṃ kīnāśā abhi yantu vāhaiḥ |śunaṃ parjanyo madhunā payobhi: śunāsīrā śunamasmāsu dhattam ||