Mandala.Sukta 4.9

वामदेवो गौतमः। अग्निः।गायत्री। · vāmadevo gautamaḥ | agniḥ |gāyatrī |

अग्ने॑ मृ॒ळ म॒हाँ अ॑सि॒ य ई॒मा दे॑व॒युं जन॑म् ।इ॒येथ॑ ब॒र्हिरा॒सद॑म्॥

agne mṛḷa mahām̐ asi ya īmā devayuṃ janam |iyetha barhirāsadam ||

स मानु॑षीषु दू॒ळभो॑ वि॒क्षु प्रा॒वीरम॑र्त्यः ।दू॒तो विश्वे॑षां भुवत्॥

sa mānuṣīṣu dūḷabho vikṣu prāvīramartyaḥ |dūto viśveṣāṃ bhuvat ||

स सद्म॒ परि॑ णीयते॒ होता॑ म॒न्द्रो दिवि॑ष्टिषु ।उ॒त पोता॒ नि षी॑दति॥

sa sadma pari ṇīyate hotā mandro diviṣṭiṣu |uta potā ni ṣīdati ||

उ॒त ग्ना अ॒ग्निर॑ध्व॒र उ॒तो गृ॒हप॑ति॒र्दमे॑ ।उ॒त ब्र॒ह्मा नि षी॑दति॥

uta gnā agniradhvara uto gṛhapatirdame |uta brahmā ni ṣīdati ||

वेषि॒ ह्य॑ध्वरीय॒तामु॑पव॒क्ता जना॑नाम् ।ह॒व्या च॒ मानु॑षाणाम्॥

veṣi hyadhvarīyatāmupavaktā janānām |havyā ca mānuṣāṇām ||

वेषीद्व॑स्य दू॒त्यं१ यस्य॒ जुजो॑षो अध्व॒रम् ।ह॒व्यं मर्त॑स्य॒ वोळह॑वे॥

veṣīdvasya dūtyaṃ1 yasya jujoṣo adhvaram |havyaṃ martasya voḷahave ||

अ॒स्माकं॑ जोष्यध्व॒रम॒स्माकं॑ य॒ज्ञम॑ङ्गिरः ।अ॒स्माकं॑ शृणुधी॒ हव॑म्॥

asmākaṃ joṣyadhvaramasmākaṃ yajñamaṅgiraḥ |asmākaṃ śṛṇudhī havam ||

परि॑ ते दू॒ळभो॒ रथो॒ऽस्माँ अ॑श्नोतु वि॒श्वत॑: ।येन॒ रक्ष॑सि दा॒शुष॑:॥

pari te dūḷabho ratho'smām̐ aśnotu viśvata: |yena rakṣasi dāśuṣa: ||