Mandala.Sukta 5.16

पूरुरात्रेयः। अग्निः। अनुष्टुप्, ५ पंक्तिः। · pūrurātreyaḥ | agniḥ | anuṣṭup, 5 paṃktiḥ |

बृ॒हद् वयो॒ हि भा॒नवेऽर्चा॑ दे॒वाया॒ग्नये॑ ।यं मि॒त्रं न प्रश॑स्तिभि॒र्मर्ता॑सो दधि॒रे पु॒रः॥

bṛhad vayo hi bhānave'rcā devāyāgnaye |yaṃ mitraṃ na praśastibhirmartāso dadhire puraḥ ||

स हि द्युभि॒र्जना॑नां॒ होता॒ दक्ष॑स्य बा॒ह्वोः ।वि ह॒व्यम॒ग्निरा॑नु॒षग्भगो॒ न वार॑मृण्वति॥

sa hi dyubhirjanānāṃ hotā dakṣasya bāhvoḥ |vi havyamagnirānuṣagbhago na vāramṛṇvati ||

अ॒स्य स्तोमे॑ म॒घोन॑: स॒ख्ये वृ॒द्धशो॑चिषः ।विश्वा॒ यस्मि॑न् तुवि॒ष्वणि॒ सम॒र्ये शुष्म॑माद॒धुः॥

asya stome maghona: sakhye vṛddhaśociṣaḥ |viśvā yasmin tuviṣvaṇi samarye śuṣmamādadhuḥ ||

अधा॒ ह्य॑ग्न एषां सु॒वीर्य॑स्य मं॒हना॑ ।तमिद् य॒ह्वं न रोद॑सी॒ परि॒ श्रवो॑ बभूवतुः॥

adhā hyagna eṣāṃ suvīryasya maṃhanā |tamid yahvaṃ na rodasī pari śravo babhūvatuḥ ||

नू न॒ एहि॒ वार्य॒मग्ने॑ गृणा॒न आ भ॑र ।ये व॒यं ये च॑ सू॒रय॑: स्व॒स्ति धाम॑हे॒ सचो॒तैधि॑ पृ॒त्सु नो॑ वृ॒धे॥

nū na ehi vāryamagne gṛṇāna ā bhara |ye vayaṃ ye ca sūraya: svasti dhāmahe sacotaidhi pṛtsu no vṛdhe ||