Mandala.Sukta 5.21

सस आत्रेयः। अग्निः। अनुष्टुप्, ४ पंक्तिः। · sasa ātreyaḥ | agniḥ | anuṣṭup, 4 paṃktiḥ |

म॒नु॒ष्वत् त्वा॒ नि धी॑महि मनु॒ष्वत् समि॑धीमहि ।अग्ने॑ मनु॒ष्वद॑ङ्गिरो दे॒वान् दे॑वय॒ते य॑ज॥

manuṣvat tvā ni dhīmahi manuṣvat samidhīmahi |agne manuṣvadaṅgiro devān devayate yaja ||

त्वं हि मानु॑षे॒ जनेऽग्ने॒ सुप्री॑त इ॒ध्यसे॑ ।स्रुच॑स्त्वा यन्त्यानु॒षक् सुजा॑त॒ सर्पि॑रासुते॥

tvaṃ hi mānuṣe jane'gne suprīta idhyase |srucastvā yantyānuṣak sujāta sarpirāsute ||

त्वां विश्वे॑ स॒जोष॑सो दे॒वासो॑ दू॒तम॑क्रत ।स॒प॒र्यन्त॑स्त्वा कवे य॒ज्ञेषु॑ दे॒वमी॑ळते॥

tvāṃ viśve sajoṣaso devāso dūtamakrata |saparyantastvā kave yajñeṣu devamīḷate ||

दे॒वं वो॑ देवय॒ज्यया॒ ऽग्निमी॑ळीत॒ मर्त्य॑: ।समि॑द्धः शुक्र दीदिह्यृ॒तस्य॒ योनि॒मास॑दः स॒सस्य॒ योनि॒मास॑दः॥

devaṃ vo devayajyayā 'gnimīḷīta martya: |samiddhaḥ śukra dīdihyṛtasya yonimāsadaḥ sasasya yonimāsadaḥ ||