Mandala.Sukta 5.28

विश्ववारात्रेयी। अग्निः। १, ३ त्रिष्टुप्, २ जगती, ४ अनुष्टुप्, ५-६ गायत्री। · viśvavārātreyī | agniḥ | 1, 3 triṣṭup, 2 jagatī, 4 anuṣṭup, 5-6 gāyatrī |

समि॑द्धो अ॒ग्निर्दि॒वि शो॒चिर॑श्रेत् प्र॒त्यङ्ङु॒षस॑मुर्वि॒या वि भा॑ति ।एति॒ प्राची॑ वि॒श्ववा॑रा॒ नमो॑भिर्दे॒वाँ ईळा॑ना ह॒विषा॑ घृ॒ताची॑॥

samiddho agnirdivi śociraśret pratyaṅṅuṣasamurviyā vi bhāti |eti prācī viśvavārā namobhirdevām̐ īḷānā haviṣā ghṛtācī ||

स॒मि॒ध्यमा॑नो अ॒मृत॑स्य राजसि ह॒विष्कृ॒ण्वन्तं॑ सचसे स्व॒स्तये॑ ।विश्वं॒ स ध॑त्ते॒ द्रवि॑णं॒ यमिन्व॑स्याति॒थ्यम॑ग्ने॒ नि च॑ धत्त॒ इत् पु॒रः॥

samidhyamāno amṛtasya rājasi haviṣkṛṇvantaṃ sacase svastaye |viśvaṃ sa dhatte draviṇaṃ yaminvasyātithyamagne ni ca dhatta it puraḥ ||

अग्ने॒ शर्ध॑ मह॒ते सौभ॑गाय॒ तव॑ द्यु॒म्नान्यु॑त्त॒मानि॑ सन्तु ।सं जा॑स्प॒त्यं सु॒यम॒मा कृ॑णुष्व शत्रूय॒ताम॒भि ति॑ष्ठा॒ महां॑सि॥

agne śardha mahate saubhagāya tava dyumnānyuttamāni santu |saṃ jāspatyaṃ suyamamā kṛṇuṣva śatrūyatāmabhi tiṣṭhā mahāṃsi ||

समि॑द्धस्य॒ प्रम॑ह॒सोऽग्ने॒ वन्दे॒ तव॒ श्रिय॑म् ।वृ॒ष॒भो द्यु॒म्नवाँ॑ असि॒ सम॑ध्व॒रेष्वि॑ध्यसे॥

samiddhasya pramahaso'gne vande tava śriyam |vṛṣabho dyumnavām̐ asi samadhvareṣvidhyase ||

समि॑द्धो अग्न आहुत दे॒वान् य॑क्षि स्वध्वर ।त्वं हि ह॑व्य॒वाळसि॑॥

samiddho agna āhuta devān yakṣi svadhvara |tvaṃ hi havyavāḷasi ||

आ जु॑होता दुव॒स्यता॒ऽग्निं प्र॑य॒त्य॑ध्व॒रे ।वृ॒णी॒ध्वं ह॑व्य॒वाह॑नम्॥

ā juhotā duvasyatā'gniṃ prayatyadhvare |vṛṇīdhvaṃ havyavāhanam ||