Mandala.Sukta 5.78

सप्तवध्रिरात्रेयः। अश्विनौ(५-९ गर्भस्राविण्युपनिषद्)। अनुष्टुप्, १-३ उष्णिक्, ४ त्रिष्टुप्। · saptavadhrirātreyaḥ | aśvinau(5-9 garbhasrāviṇyupaniṣad) | anuṣṭup, 1-3 uṣṇik, 4 triṣṭup |

अश्वि॑ना॒वेह ग॑च्छतं॒ नास॑त्या॒ मा वि वे॑नतम् ।हं॒सावि॑व पतत॒मा सु॒ताँ उप॑॥

aśvināveha gacchataṃ nāsatyā mā vi venatam |haṃsāviva patatamā sutām̐ upa ||

अश्वि॑ना हरि॒णावि॑व गौ॒रावि॒वानु॒ यव॑सम् ।हं॒सावि॑व पतत॒मा सु॒ताँ उप॑॥

aśvinā hariṇāviva gaurāvivānu yavasam |haṃsāviva patatamā sutām̐ upa ||

अश्वि॑ना वाजिनीवसू जु॒षेथां॑ य॒ज्ञमि॒ष्टये॑ ।हं॒सावि॑व पतत॒मा सु॒ताँ उप॑॥

aśvinā vājinīvasū juṣethāṃ yajñamiṣṭaye |haṃsāviva patatamā sutām̐ upa ||

अत्रि॒र्यद् वा॑मव॒रोह॑न्नृ॒बीस॒मजो॑हवी॒न्नाध॑मानेव॒ योषा॑ ।श्ये॒नस्य॑ चि॒ज्जव॑सा॒ नूत॑ने॒ना ऽऽग॑च्छतमश्विना॒ शंत॑मेन॥

atriryad vāmavarohannṛbīsamajohavīnnādhamāneva yoṣā |śyenasya cijjavasā nūtanenā ''gacchatamaśvinā śaṃtamena ||

वि जि॑हीष्व वनस्पते॒ योनि॒: सूष्य॑न्त्या इव ।श्रु॒तं मे॑ अश्विना॒ हवं॑ स॒प्तव॑ध्रिं च मुञ्चतम्॥

vi jihīṣva vanaspate yoni: sūṣyantyā iva |śrutaṃ me aśvinā havaṃ saptavadhriṃ ca muñcatam ||

भी॒ताय॒ नाध॑मानाय॒ ऋष॑ये स॒प्तव॑ध्रये ।मा॒याभि॑रश्विना यु॒वं वृ॒क्षं सं च॒ वि चा॑चथः॥

bhītāya nādhamānāya ṛṣaye saptavadhraye |māyābhiraśvinā yuvaṃ vṛkṣaṃ saṃ ca vi cācathaḥ ||

यथा॒ वात॑: पुष्क॒रिणीं॑ समि॒ङ्गय॑ति स॒र्वत॑: ।ए॒वा ते॒ गर्भ॑ एजतु नि॒रैतु॒ दश॑मास्यः॥

yathā vāta: puṣkariṇīṃ samiṅgayati sarvata: |evā te garbha ejatu niraitu daśamāsyaḥ ||

यथा॒ वातो॒ यथा॒ वनं॒ यथा॑ समु॒द्र एज॑ति ।ए॒वा त्वं द॑शमास्य स॒हावे॑हि ज॒रायु॑णा॥

yathā vāto yathā vanaṃ yathā samudra ejati |evā tvaṃ daśamāsya sahāvehi jarāyuṇā ||

दश॒ मासा॑ञ्छशया॒नः कु॑मा॒रो अधि॑ मा॒तरि॑ ।नि॒रैतु॑ जी॒वो अक्ष॑तो जी॒वो जीव॑न्त्या॒ अधि॑॥

daśa māsāñchaśayānaḥ kumāro adhi mātari |niraitu jīvo akṣato jīvo jīvantyā adhi ||