Mandala.Sukta 5.80

सत्यश्रवा आत्रेयः। उषा। त्रिष्टुप्। · satyaśravā ātreyaḥ | uṣā | triṣṭup |

द्यु॒तद्या॑मानं बृह॒तीमृ॒तेन॑ ऋ॒ताव॑रीमरु॒णप्सुं॑ विभा॒तीम् ।दे॒वीमु॒षसं॒ स्व॑रा॒वह॑न्तीं॒ प्रति॒ विप्रा॑सो म॒तिभि॑र्जरन्ते॥

dyutadyāmānaṃ bṛhatīmṛtena ṛtāvarīmaruṇapsuṃ vibhātīm |devīmuṣasaṃ svarāvahantīṃ prati viprāso matibhirjarante ||

ए॒षा जनं॑ दर्श॒ता बो॒धय॑न्ती सु॒गान् प॒थः कृ॑ण्व॒ती या॒त्यग्रे॑ ।बृ॒ह॒द्र॒था बृ॑ह॒ती वि॑श्वमि॒न्वोषा ज्योति॑र्यच्छ॒त्यग्रे॒ अह्ना॑म्॥

eṣā janaṃ darśatā bodhayantī sugān pathaḥ kṛṇvatī yātyagre |bṛhadrathā bṛhatī viśvaminvoṣā jyotiryacchatyagre ahnām ||

ए॒षा गोभि॑ररु॒णेभि॑र्युजा॒ना ऽस्रे॑धन्ती र॒यिमप्रा॑यु चक्रे ।प॒थो रद॑न्ती सुवि॒ताय॑ दे॒वी पु॑रुष्टु॒ता वि॒श्ववा॑रा॒ वि भा॑ति॥

eṣā gobhiraruṇebhiryujānā 'sredhantī rayimaprāyu cakre |patho radantī suvitāya devī puruṣṭutā viśvavārā vi bhāti ||

ए॒षा व्ये॑नी भवति द्वि॒बर्हा॑ आविष्कृण्वा॒ना त॒न्वं॑ पु॒रस्ता॑त् ।ऋ॒तस्य॒ पन्था॒मन्वे॑ति सा॒धु प्र॑जान॒तीव॒ न दिशो॑ मिनाति॥

eṣā vyenī bhavati dvibarhā āviṣkṛṇvānā tanvaṃ purastāt |ṛtasya panthāmanveti sādhu prajānatīva na diśo mināti ||

ए॒षा शु॒भ्रा न त॒न्वो॑ विदा॒नोर्ध्वेव॑ स्ना॒ती दृ॒शये॑ नो अस्थात् ।अप॒ द्वेषो॒ बाध॑माना॒ तमां॑स्यु॒षा दि॒वो दु॑हि॒ता ज्योति॒षागा॑त्॥

eṣā śubhrā na tanvo vidānordhveva snātī dṛśaye no asthāt |apa dveṣo bādhamānā tamāṃsyuṣā divo duhitā jyotiṣāgāt ||

ए॒षा प्र॑ती॒ची दु॑हि॒ता दि॒वो नॄन् योषे॑व भ॒द्रा नि रि॑णीते॒ अप्स॑: ।व्यू॒र्ण्व॒ती दा॒शुषे॒ वार्या॑णि॒ पुन॒र्ज्योति॑र्युव॒तिः पू॒र्वथा॑कः॥

eṣā pratīcī duhitā divo nṝn yoṣeva bhadrā ni riṇīte apsa: |vyūrṇvatī dāśuṣe vāryāṇi punarjyotiryuvatiḥ pūrvathākaḥ ||