Mandala.Sukta 6.18

बार्हस्पत्यो भरद्वाज: । इन्द्र: ।त्रिष्टुप् । · bārhaspatyo bharadvāja: | indra: |triṣṭup |

तमु॑ ष्टुहि॒ यो अ॒भिभू॑त्योजा व॒न्वन्नवा॑तः पुरुहू॒त इन्द्र॑: ।अषा॑ळ्हमु॒ग्रं सह॑मानमा॒भिर्गी॒र्भिर्व॑र्ध वृष॒भं च॑र्षणी॒नाम्॥

tamu ṣṭuhi yo abhibhūtyojā vanvannavātaḥ puruhūta indra: |aṣāḷhamugraṃ sahamānamābhirgīrbhirvardha vṛṣabhaṃ carṣaṇīnām ||

स यु॒ध्मः सत्वा॑ खज॒कृत् स॒मद्वा॑ तुविम्र॒क्षो न॑दनु॒माँ ऋ॑जी॒षी ।बृ॒हद्रे॑णु॒श्च्यव॑नो॒ मानु॑षीणा॒मेक॑: कृष्टी॒नाम॑भवत् स॒हावा॑॥

sa yudhmaḥ satvā khajakṛt samadvā tuvimrakṣo nadanumām̐ ṛjīṣī |bṛhadreṇuścyavano mānuṣīṇāmeka: kṛṣṭīnāmabhavat sahāvā ||

त्वं ह॒ नु त्यद॑दमायो॒ दस्यूँ॒रेक॑: कृ॒ष्टीर॑वनो॒रार्या॑य ।अस्ति॑ स्वि॒न्नु वी॒र्यं१ तत् त॑ इन्द्र॒ न स्वि॑दस्ति॒ तदृ॑तु॒था वि वो॑चः॥

tvaṃ ha nu tyadadamāyo dasyūm̐reka: kṛṣṭīravanorāryāya |asti svinnu vīryaṃ1 tat ta indra na svidasti tadṛtuthā vi vocaḥ ||

सदिद्धि ते॑ तुविजा॒तस्य॒ मन्ये॒ सह॑: सहिष्ठ तुर॒तस्तु॒रस्य॑ ।उ॒ग्रमु॒ग्रस्य॑ त॒वस॒स्तवी॒यो ऽर॑ध्रस्य रध्र॒तुरो॑ बभूव॥

sadiddhi te tuvijātasya manye saha: sahiṣṭha turatasturasya |ugramugrasya tavasastavīyo 'radhrasya radhraturo babhūva ||

तन्न॑: प्र॒त्नं स॒ख्यम॑स्तु यु॒ष्मे इ॒त्था वद॑द्भिर्व॒लमङ्गि॑रोभिः ।हन्न॑च्युतच्युद् दस्मे॒षय॑न्तमृ॒णोः पुरो॒ वि दुरो॑ अस्य॒ विश्वा॑:॥

tanna: pratnaṃ sakhyamastu yuṣme itthā vadadbhirvalamaṅgirobhiḥ |hannacyutacyud dasmeṣayantamṛṇoḥ puro vi duro asya viśvā: ||

स हि धी॒भिर्हव्यो॒ अस्त्यु॒ग्र ई॑शान॒कृन्म॑ह॒ति वृ॑त्र॒तूर्ये॑ ।स तो॒कसा॑ता॒ तन॑ये॒ स व॒ज्री वि॑तन्त॒साय्यो॑ अभवत् स॒मत्सु॑॥

sa hi dhībhirhavyo astyugra īśānakṛnmahati vṛtratūrye |sa tokasātā tanaye sa vajrī vitantasāyyo abhavat samatsu ||

स म॒ज्मना॒ जनि॑म॒ मानु॑षाणा॒मम॑र्त्येन॒ नाम्नाति॒ प्र स॑र्स्रे ।स द्यु॒म्नेन॒ स शव॑सो॒त रा॒या स वी॒र्ये॑ण॒ नृत॑म॒: समो॑काः॥

sa majmanā janima mānuṣāṇāmamartyena nāmnāti pra sarsre |sa dyumnena sa śavasota rāyā sa vīryeṇa nṛtama: samokāḥ ||

स यो न मु॒हे न मिथू॒ जनो॒ भूत् सुमन्तु॑नामा॒ चुमु॑रिं॒ धुनिं॑ च ।वृ॒णक् पिप्रुं॒ शम्ब॑रं॒ शुष्ण॒मिन्द्र॑: पु॒रां च्यौ॒त्नाय॑ श॒यथा॑य॒ नू चि॑त्॥

sa yo na muhe na mithū jano bhūt sumantunāmā cumuriṃ dhuniṃ ca |vṛṇak pipruṃ śambaraṃ śuṣṇamindra: purāṃ cyautnāya śayathāya nū cit ||

उ॒दाव॑ता॒ त्वक्ष॑सा॒ पन्य॑सा च वृत्र॒हत्या॑य॒ रथ॑मिन्द्र तिष्ठ ।धि॒ष्व वज्रं॒ हस्त॒ आ द॑क्षिण॒त्रा ऽभि प्र म॑न्द पुरुदत्र मा॒याः॥

udāvatā tvakṣasā panyasā ca vṛtrahatyāya rathamindra tiṣṭha |dhiṣva vajraṃ hasta ā dakṣiṇatrā 'bhi pra manda purudatra māyāḥ ||

अ॒ग्निर्न शुष्कं॒ वन॑मिन्द्र हे॒ती रक्षो॒ नि ध॑क्ष्य॒शनि॒र्न भी॒मा ।ग॒म्भी॒रय॑ ऋ॒ष्वया॒ यो रु॒रोजाध्वा॑नयद् दुरि॒ता द॒म्भय॑च्च॥

agnirna śuṣkaṃ vanamindra hetī rakṣo ni dhakṣyaśanirna bhīmā |gambhīraya ṛṣvayā yo rurojādhvānayad duritā dambhayacca ||

आ स॒हस्रं॑ प॒थिभि॑रिन्द्र रा॒या तुवि॑द्युम्न तुवि॒वाजे॑भिर॒र्वाक् ।या॒हि सू॑नो सहसो॒ यस्य॒ नू चि॒ददे॑व॒ ईशे॑ पुरुहूत॒ योतो॑:॥

ā sahasraṃ pathibhirindra rāyā tuvidyumna tuvivājebhirarvāk |yāhi sūno sahaso yasya nū cidadeva īśe puruhūta yoto: ||

प्र तु॑विद्यु॒म्नस्य॒ स्थवि॑रस्य॒ घृष्वे॑र्दि॒वो र॑रप्शे महि॒मा पृ॑थि॒व्याः ।नास्य॒ शत्रु॒र्न प्र॑ति॒मान॑मस्ति॒ न प्र॑ति॒ष्ठिः पु॑रुमा॒यस्य॒ सह्यो॑:॥

pra tuvidyumnasya sthavirasya ghṛṣverdivo rarapśe mahimā pṛthivyāḥ |nāsya śatrurna pratimānamasti na pratiṣṭhiḥ purumāyasya sahyo: ||

प्र तत् ते अ॒द्या कर॑णं कृ॒तं भू॒त् कुत्सं॒ यदा॒युम॑तिथि॒ग्वम॑स्मै ।पु॒रू स॒हस्रा॒ नि शि॑शा अ॒भि क्षामुत् तूर्व॑याणं धृष॒ता नि॑नेथ॥

pra tat te adyā karaṇaṃ kṛtaṃ bhūt kutsaṃ yadāyumatithigvamasmai |purū sahasrā ni śiśā abhi kṣāmut tūrvayāṇaṃ dhṛṣatā ninetha ||

अनु॒ त्वाहि॑घ्ने॒ अध॑ देव दे॒वा मद॒न् विश्वे॑ क॒वित॑मं कवी॒नाम् ।करो॒ यत्र॒ वरि॑वो बाधि॒ताय॑ दि॒वे जना॑य त॒न्वे॑ गृणा॒नः॥

anu tvāhighne adha deva devā madan viśve kavitamaṃ kavīnām |karo yatra varivo bādhitāya dive janāya tanve gṛṇānaḥ ||

अनु॒ द्यावा॑पृथि॒वी तत् त॒ ओजो ऽम॑र्त्या जिहत इन्द्र दे॒वाः ।कृ॒ष्वा कृ॑त्नो॒ अकृ॑तं॒ यत् ते॒ अस्त्यु॒क्थं नवी॑यो जनयस्व य॒ज्ञैः॥

anu dyāvāpṛthivī tat ta ojo 'martyā jihata indra devāḥ |kṛṣvā kṛtno akṛtaṃ yat te astyukthaṃ navīyo janayasva yajñaiḥ ||