Mandala.Sukta 7.41

मैत्रावरुणिर्वसिष्ठ:।१ अग्नीन्द्रमित्रावरुणाश्विभगपूषब्रह्मणस्पतिसोमरुद्रा:, २-६ भग:, ७ उषस:। त्रिष्टुप् , १ जगती । · maitrāvaruṇirvasiṣṭha: |1 agnīndramitrāvaruṇāśvibhagapūṣabrahmaṇaspatisomarudrā:, 2-6 bhaga:, 7 uṣasa: | triṣṭup , 1 jagatī |

प्रा॒तर॒ग्निं प्रा॒तरिन्द्रं॑ हवामहे प्रा॒तर्मि॒त्रावरु॑णा प्रा॒तर॒श्विना॑ ।प्रा॒तर्भगं॑ पू॒षणं॒ ब्रह्म॑ण॒स्पतिं॑ प्रा॒तः सोम॑मु॒त रु॒द्रं हु॑वेम॥

prātaragniṃ prātarindraṃ havāmahe prātarmitrāvaruṇā prātaraśvinā |prātarbhagaṃ pūṣaṇaṃ brahmaṇaspatiṃ prātaḥ somamuta rudraṃ huvema ||

प्रा॒त॒र्जितं॒ भग॑मु॒ग्रं हु॑वेम व॒यं पु॒त्रमदि॑ते॒र्यो वि॑ध॒र्ता ।आ॒ध्रश्चि॒द्यं मन्य॑मानस्तु॒रश्चि॒द्राजा॑ चि॒द्यं भगं॑ भ॒क्षीत्याह॑॥

prātarjitaṃ bhagamugraṃ huvema vayaṃ putramaditeryo vidhartā |ādhraścidyaṃ manyamānasturaścidrājā cidyaṃ bhagaṃ bhakṣītyāha ||

भग॒ प्रणे॑त॒र्भग॒ सत्य॑राधो॒ भगे॒मां धिय॒मुद॑वा॒ दद॑न्नः ।भग॒ प्र णो॑ जनय॒ गोभि॒रश्वै॒र्भग॒ प्र नृभि॑र्नृ॒वन्त॑: स्याम॥

bhaga praṇetarbhaga satyarādho bhagemāṃ dhiyamudavā dadannaḥ |bhaga pra ṇo janaya gobhiraśvairbhaga pra nṛbhirnṛvanta: syāma ||

उ॒तेदानीं॒ भग॑वन्तः स्यामो॒त प्र॑पि॒त्व उ॒त मध्ये॒ अह्ना॑म् ।उ॒तोदि॑ता मघव॒न्त्सूर्य॑स्य व॒यं दे॒वानां॑ सुम॒तौ स्या॑म॥

utedānīṃ bhagavantaḥ syāmota prapitva uta madhye ahnām |utoditā maghavantsūryasya vayaṃ devānāṃ sumatau syāma ||

भग॑ ए॒व भग॑वाँ अस्तु देवा॒स्तेन॑ व॒यं भग॑वन्तः स्याम ।तं त्वा॑ भग॒ सर्व॒ इज्जो॑हवीति॒ स नो॑ भग पुरए॒ता भ॑वे॒ह॥

bhaga eva bhagavām̐ astu devāstena vayaṃ bhagavantaḥ syāma |taṃ tvā bhaga sarva ijjohavīti sa no bhaga puraetā bhaveha ||

सम॑ध्व॒रायो॒षसो॑ नमन्त दधि॒क्रावे॑व॒ शुच॑ये प॒दाय॑ ।अ॒र्वा॒ची॒नं व॑सु॒विदं॒ भगं॑ नो॒ रथ॑मि॒वाश्वा॑ वा॒जिन॒ आ व॑हन्तु॥

samadhvarāyoṣaso namanta dadhikrāveva śucaye padāya |arvācīnaṃ vasuvidaṃ bhagaṃ no rathamivāśvā vājina ā vahantu ||

अश्वा॑वती॒र्गोम॑तीर्न उ॒षासो॑ वी॒रव॑ती॒: सद॑मुच्छन्तु भ॒द्राः ।घृ॒तं दुहा॑ना वि॒श्वत॒: प्रपी॑ता यू॒यं पा॑त स्व॒स्तिभि॒: सदा॑ नः॥

aśvāvatīrgomatīrna uṣāso vīravatī: sadamucchantu bhadrāḥ |ghṛtaṃ duhānā viśvata: prapītā yūyaṃ pāta svastibhi: sadā naḥ ||