Mandala.Sukta 7.44

मैत्रावरुणिर्वसिष्ठ:। दधिका:, १ दधिकाश्व्युषोऽ ग्निभगेन्द्रविष्णुपूषब्रह्मणस्पत्यादित्यद्यावापृथिव्याप:। त्रिष्टुप् ,१ जगती। · maitrāvaruṇirvasiṣṭha: | dadhikā:, 1 dadhikāśvyuṣo' gnibhagendraviṣṇupūṣabrahmaṇaspatyādityadyāvāpṛthivyāpa: | triṣṭup ,1 jagatī |

द॒धि॒क्रां व॑: प्रथ॒मम॒श्विनो॒षस॑म॒ग्निं समि॑द्धं॒ भग॑मू॒तये॑ हुवे ।इन्द्रं॒ विष्णुं॑ पू॒षणं॒ ब्रह्म॑ण॒स्पति॑मादि॒त्यान्द्यावा॑पृथि॒वी अ॒पः स्व॑:॥

dadhikrāṃ va: prathamamaśvinoṣasamagniṃ samiddhaṃ bhagamūtaye huve |indraṃ viṣṇuṃ pūṣaṇaṃ brahmaṇaspatimādityāndyāvāpṛthivī apaḥ sva: ||

द॒धि॒क्रामु॒ नम॑सा बो॒धय॑न्त उ॒दीरा॑णा य॒ज्ञमु॑पप्र॒यन्त॑: ।इळां॑ दे॒वीं ब॒र्हिषि॑ सा॒दय॑न्तो॒ऽश्विना॒ विप्रा॑ सु॒हवा॑ हुवेम॥

dadhikrāmu namasā bodhayanta udīrāṇā yajñamupaprayanta: |iḷāṃ devīṃ barhiṣi sādayanto'śvinā viprā suhavā huvema ||

द॒धि॒क्रावा॑णं बुबुधा॒नो अ॒ग्निमुप॑ ब्रुव उ॒षसं॒ सूर्यं॒ गाम् ।ब्र॒ध्नं मं॑श्च॒तोर्वरु॑णस्य ब॒भ्रुं ते विश्वा॒स्मद्दु॑रि॒ता या॑वयन्तु॥

dadhikrāvāṇaṃ bubudhāno agnimupa bruva uṣasaṃ sūryaṃ gām |bradhnaṃ maṃścatorvaruṇasya babhruṃ te viśvāsmadduritā yāvayantu ||

द॒धि॒क्रावा॑ प्रथ॒मो वा॒ज्यर्वाऽग्रे॒ रथा॑नां भवति प्रजा॒नन् ।सं॒वि॒दा॒न उ॒षसा॒ सूर्ये॑णाऽऽदि॒त्येभि॒र्वसु॑भि॒रङ्गि॑रोभिः॥

dadhikrāvā prathamo vājyarvā'gre rathānāṃ bhavati prajānan |saṃvidāna uṣasā sūryeṇā''dityebhirvasubhiraṅgirobhiḥ ||

आ नो॑ दधि॒क्राः प॒थ्या॑मनक्त्वृ॒तस्य॒ पन्था॒मन्वे॑त॒वा उ॑ ।शृ॒णोतु॑ नो॒ दैव्यं॒ शर्धो॑ अ॒ग्निः शृ॒ण्वन्तु॒ विश्वे॑ महि॒षा अमू॑राः॥

ā no dadhikrāḥ pathyāmanaktvṛtasya panthāmanvetavā u |śṛṇotu no daivyaṃ śardho agniḥ śṛṇvantu viśve mahiṣā amūrāḥ ||