Mandala.Sukta 7.96

मैत्रावरुणिर्वसिष्ठ:। सरस्वती, ४-६ सरस्वान् । १-२= प्रगाथ: (१ बृहती, २ सतोबृहती ), ३ प्रस्तारपंक्ति:, ४-६ गायत्री। · maitrāvaruṇirvasiṣṭha: | sarasvatī, 4-6 sarasvān | 1-2= pragātha: (1 bṛhatī, 2 satobṛhatī ), 3 prastārapaṃkti:, 4-6 gāyatrī |

बृ॒हदु॑ गायिषे॒ वचो॑ऽसु॒र्या॑ न॒दीना॑म् ।सर॑स्वती॒मिन्म॑हया सुवृ॒क्तिभि॒: स्तोमै॑र्वसिष्ठ॒ रोद॑सी॥

bṛhadu gāyiṣe vaco'suryā nadīnām |sarasvatīminmahayā suvṛktibhi: stomairvasiṣṭha rodasī ||

उ॒भे यत्ते॑ महि॒ना शु॑भ्रे॒ अन्ध॑सी अधिक्षि॒यन्ति॑ पू॒रव॑: ।सा नो॑ बोध्यवि॒त्री म॒रुत्स॑खा॒ चोद॒ राधो॑ म॒घोना॑म्॥

ubhe yatte mahinā śubhre andhasī adhikṣiyanti pūrava: |sā no bodhyavitrī marutsakhā coda rādho maghonām ||

भ॒द्रमिद्भ॒द्रा कृ॑णव॒त्सर॑स्व॒त्यक॑वारी चेतति वा॒जिनी॑वती ।गृ॒णा॒ना ज॑मदग्नि॒वत्स्तु॑वा॒ना च॑ वसिष्ठ॒वत्॥

bhadramidbhadrā kṛṇavatsarasvatyakavārī cetati vājinīvatī |gṛṇānā jamadagnivatstuvānā ca vasiṣṭhavat ||

ज॒नी॒यन्तो॒ न्वग्र॑वः पुत्री॒यन्त॑: सु॒दान॑वः ।सर॑स्वन्तं हवामहे॥

janīyanto nvagravaḥ putrīyanta: sudānavaḥ |sarasvantaṃ havāmahe ||

ये ते॑ सरस्व ऊ॒र्मयो॒ मधु॑मन्तो घृत॒श्चुत॑: ।तेभि॑र्नोऽवि॒ता भ॑व॥

ye te sarasva ūrmayo madhumanto ghṛtaścuta: |tebhirno'vitā bhava ||

पी॒पि॒वांसं॒ सर॑स्वत॒: स्तनं॒ यो वि॒श्वद॑र्शतः ।भ॒क्षी॒महि॑ प्र॒जामिष॑म्॥

pīpivāṃsaṃ sarasvata: stanaṃ yo viśvadarśataḥ |bhakṣīmahi prajāmiṣam ||