Mandala.Sukta 8.101

जमदग्निर्भार्गव: । मित्रावरुणौ , ५ मित्रावरुणादित्या:, ६आदित्या:, ७-८ अश्विनौ, ९-१० वायु:, ११-१२ सूर्य:, १३ उषा: सूर्यप्रभा वा, १४ पवमानः, १५-१६ गौ: । १-२ प्रगाथ: = ( बृहती, सतोबृहती ), ३ गायत्री , ४ सतोबृहती , ५-१३ प्रगाथ: = ( विषमा बृहती, समा सतोबृहती, ) १४-१६ त्रिष्टुप् । · jamadagnirbhārgava: | mitrāvaruṇau , 5 mitrāvaruṇādityā:, 6ādityā:, 7-8 aśvinau, 9-10 vāyu:, 11-12 sūrya:, 13 uṣā: sūryaprabhā vā, 14 pavamānaḥ, 15-16 gau: | 1-2 pragātha: = ( bṛhatī, satobṛhatī ), 3 gāyatrī , 4 satobṛhatī , 5-13 pragātha: = ( viṣamā bṛhatī, samā satobṛhatī, ) 14-16 triṣṭup |

ऋध॑गि॒त्था स मर्त्य॑: शश॒मे दे॒वता॑तये ।यो नू॒नं मि॒त्रावरु॑णाव॒भिष्ट॑य आच॒क्रे ह॒व्यदा॑तये॥

ṛdhagitthā sa martya: śaśame devatātaye |yo nūnaṃ mitrāvaruṇāvabhiṣṭaya ācakre havyadātaye ||

वर्षि॑ष्ठक्षत्रा उरु॒चक्ष॑सा॒ नरा॒ राजा॑ना दीर्घ॒श्रुत्त॑मा ।ता बा॒हुता॒ न दं॒सना॑ रथर्यतः सा॒कं सूर्य॑स्य र॒श्मिभि॑:॥

varṣiṣṭhakṣatrā urucakṣasā narā rājānā dīrghaśruttamā |tā bāhutā na daṃsanā ratharyataḥ sākaṃ sūryasya raśmibhi: ||

प्र यो वां॑ मित्रावरुणाऽजि॒रो दू॒तो अद्र॑वत् ।अय॑:शीर्षा॒ मदे॑रघुः॥

pra yo vāṃ mitrāvaruṇā'jiro dūto adravat |aya:śīrṣā maderaghuḥ ||

न यः स॒म्पृच्छे॒ न पुन॒र्हवी॑तवे॒ न सं॑वा॒दाय॒ रम॑ते ।तस्मा॑न्नो अ॒द्य समृ॑तेरुरुष्यतं बा॒हुभ्यां॑ न उरुष्यतम्॥

na yaḥ sampṛcche na punarhavītave na saṃvādāya ramate |tasmānno adya samṛteruruṣyataṃ bāhubhyāṃ na uruṣyatam ||

प्र मि॒त्राय॒ प्रार्य॒म्णे स॑च॒थ्य॑मृतावसो ।व॒रू॒थ्यं१ वरु॑णे॒ छन्द्यं॒ वच॑: स्तो॒त्रं राज॑सु गायत॥

pra mitrāya prāryamṇe sacathyamṛtāvaso |varūthyaṃ1 varuṇe chandyaṃ vaca: stotraṃ rājasu gāyata ||

ते हि॑न्विरे अरु॒णं जेन्यं॒ वस्वेकं॑ पु॒त्रं ति॑सॄ॒णाम् ।ते धामा॑न्य॒मृता॒ मर्त्या॑ना॒मद॑ब्धा अ॒भि च॑क्षते॥

te hinvire aruṇaṃ jenyaṃ vasvekaṃ putraṃ tisṝṇām |te dhāmānyamṛtā martyānāmadabdhā abhi cakṣate ||

आ मे॒ वचां॒स्युद्य॑ता द्यु॒मत्त॑मानि॒ कर्त्वा॑ ।उ॒भा या॑तं नासत्या स॒जोष॑सा॒ प्रति॑ ह॒व्यानि॑ वी॒तये॑॥

ā me vacāṃsyudyatā dyumattamāni kartvā |ubhā yātaṃ nāsatyā sajoṣasā prati havyāni vītaye ||

रा॒तिं यद्वा॑मर॒क्षसं॒ हवा॑महे यु॒वाभ्यां॑ वाजिनीवसू ।प्राचीं॒ होत्रां॑ प्रति॒रन्ता॑वितं नरा गृणा॒ना ज॒मद॑ग्निना॥

rātiṃ yadvāmarakṣasaṃ havāmahe yuvābhyāṃ vājinīvasū |prācīṃ hotrāṃ pratirantāvitaṃ narā gṛṇānā jamadagninā ||

आ नो॑ य॒ज्ञं दि॑वि॒स्पृशं॒ वायो॑ या॒हि सु॒मन्म॑भिः ।अ॒न्तः प॒वित्र॑ उ॒परि॑ श्रीणा॒नो॒३ऽयं शु॒क्रो अ॑यामि ते॥

ā no yajñaṃ divispṛśaṃ vāyo yāhi sumanmabhiḥ |antaḥ pavitra upari śrīṇāno3'yaṃ śukro ayāmi te ||

वेत्य॑ध्व॒र्युः प॒थिभी॒ रजि॑ष्ठै॒: प्रति॑ ह॒व्यानि॑ वी॒तये॑ ।अधा॑ नियुत्व उ॒भय॑स्य नः पिब॒ शुचिं॒ सोमं॒ गवा॑शिरम्॥

vetyadhvaryuḥ pathibhī rajiṣṭhai: prati havyāni vītaye |adhā niyutva ubhayasya naḥ piba śuciṃ somaṃ gavāśiram ||

बण्म॒हाँ अ॑सि सूर्य॒ बळा॑दित्य म॒हाँ अ॑सि ।म॒हस्ते॑ स॒तो म॑हि॒मा प॑नस्यते॒ऽद्धा दे॑व म॒हाँ अ॑सि॥

baṇmahām̐ asi sūrya baḷāditya mahām̐ asi |mahaste sato mahimā panasyate'ddhā deva mahām̐ asi ||

बट् सू॑र्य॒ श्रव॑सा म॒हाँ अ॑सि स॒त्रा दे॑व म॒हाँ अ॑सि ।म॒ह्ना दे॒वाना॑मसु॒र्य॑: पु॒रोहि॑तो वि॒भु ज्योति॒रदा॑भ्यम्॥

baṭ sūrya śravasā mahām̐ asi satrā deva mahām̐ asi |mahnā devānāmasurya: purohito vibhu jyotiradābhyam ||

इ॒यं या नीच्य॒र्किणी॑ रू॒पा रोहि॑ण्या कृ॒ता ।चि॒त्रेव॒ प्रत्य॑दर्श्याय॒त्य१न्तर्द॒शसु॑ बा॒हुषु॑॥

iyaṃ yā nīcyarkiṇī rūpā rohiṇyā kṛtā |citreva pratyadarśyāyatya1ntardaśasu bāhuṣu ||

प्र॒जा ह॑ ति॒स्रो अ॒त्याय॑मीयु॒र्न्य१न्या अ॒र्कम॒भितो॑ विविश्रे ।बृ॒हद्ध॑ तस्थौ॒ भुव॑नेष्व॒न्तः पव॑मानो ह॒रित॒ आ वि॑वेश॥

prajā ha tisro atyāyamīyurnya1nyā arkamabhito viviśre |bṛhaddha tasthau bhuvaneṣvantaḥ pavamāno harita ā viveśa ||

मा॒ता रु॒द्राणां॑ दुहि॒ता वसू॑नां॒ स्वसा॑दि॒त्याना॑म॒मृत॑स्य॒ नाभि॑: ।प्र नु वो॑चं चिकि॒तुषे॒ जना॑य॒ मा गामना॑गा॒मदि॑तिं वधिष्ट॥

mātā rudrāṇāṃ duhitā vasūnāṃ svasādityānāmamṛtasya nābhi: |pra nu vocaṃ cikituṣe janāya mā gāmanāgāmaditiṃ vadhiṣṭa ||

व॒चो॒विदं॒ वाच॑मुदी॒रय॑न्तीं॒ विश्वा॑भिर्धी॒भिरु॑प॒तिष्ठ॑मानाम् ।दे॒वीं दे॒वेभ्य॒: पर्ये॒युषीं॒ गामा मा॑वृक्त॒ मर्त्यो॑ द॒भ्रचे॑ताः॥

vacovidaṃ vācamudīrayantīṃ viśvābhirdhībhirupatiṣṭhamānām |devīṃ devebhya: paryeyuṣīṃ gāmā māvṛkta martyo dabhracetāḥ ||