Mandala.Sukta 8.13

नारद: काण्व: । इन्द्र: । उष्णिक् । · nārada: kāṇva: | indra: | uṣṇik |

इन्द्र॑: सु॒तेषु॒ सोमे॑षु॒ क्रतुं॑ पुनीत उ॒क्थ्य॑म् ।वि॒दे वृ॒धस्य॒ दक्ष॑सो म॒हान्हि षः॥

indra: suteṣu someṣu kratuṃ punīta ukthyam |vide vṛdhasya dakṣaso mahānhi ṣaḥ ||

स प्र॑थ॒मे व्यो॑मनि दे॒वानां॒ सद॑ने वृ॒धः ।सु॒पा॒रः सु॒श्रव॑स्तम॒: सम॑प्सु॒जित्॥

sa prathame vyomani devānāṃ sadane vṛdhaḥ |supāraḥ suśravastama: samapsujit ||

तम॑ह्वे॒ वाज॑सातय॒ इन्द्रं॒ भरा॑य शु॒ष्मिण॑म् ।भवा॑ नः सु॒म्ने अन्त॑म॒: सखा॑ वृ॒धे॥

tamahve vājasātaya indraṃ bharāya śuṣmiṇam |bhavā naḥ sumne antama: sakhā vṛdhe ||

इ॒यं त॑ इन्द्र गिर्वणो रा॒तिः क्ष॑रति सुन्व॒तः ।म॒न्दा॒नो अ॒स्य ब॒र्हिषो॒ वि रा॑जसि॥

iyaṃ ta indra girvaṇo rātiḥ kṣarati sunvataḥ |mandāno asya barhiṣo vi rājasi ||

नू॒नं तदि॑न्द्र दद्धि नो॒ यत्त्वा॑ सु॒न्वन्त॒ ईम॑हे ।र॒यिं न॑श्चि॒त्रमा भ॑रा स्व॒र्विद॑म्॥

nūnaṃ tadindra daddhi no yattvā sunvanta īmahe |rayiṃ naścitramā bharā svarvidam ||

स्तो॒ता यत्ते॒ विच॑र्षणिरतिप्रश॒र्धय॒द्गिर॑: ।व॒या इ॒वानु॑ रोहते जु॒षन्त॒ यत्॥

stotā yatte vicarṣaṇiratipraśardhayadgira: |vayā ivānu rohate juṣanta yat ||

प्र॒त्न॒वज्ज॑नया॒ गिर॑: शृणु॒धी ज॑रि॒तुर्हव॑म् ।मदे॑मदे ववक्षिथा सु॒कृत्व॑ने॥

pratnavajjanayā gira: śṛṇudhī jariturhavam |mademade vavakṣithā sukṛtvane ||

क्रीळ॑न्त्यस्य सू॒नृता॒ आपो॒ न प्र॒वता॑ य॒तीः ।अ॒या धि॒या य उ॒च्यते॒ पति॑र्दि॒वः॥

krīḷantyasya sūnṛtā āpo na pravatā yatīḥ |ayā dhiyā ya ucyate patirdivaḥ ||

उ॒तो पति॒र्य उ॒च्यते॑ कृष्टी॒नामेक॒ इद्व॒शी ।न॒मो॒वृ॒धैर॑व॒स्युभि॑: सु॒ते र॑ण॥

uto patirya ucyate kṛṣṭīnāmeka idvaśī |namovṛdhairavasyubhi: sute raṇa ||

स्तु॒हि श्रु॒तं वि॑प॒श्चितं॒ हरी॒ यस्य॑ प्रस॒क्षिणा॑ ।गन्ता॑रा दा॒शुषो॑ गृ॒हं न॑म॒स्विन॑:॥

stuhi śrutaṃ vipaścitaṃ harī yasya prasakṣiṇā |gantārā dāśuṣo gṛhaṃ namasvina: ||

तू॒तु॒जा॒नो म॑हेम॒तेऽश्वे॑भिः प्रुषि॒तप्सु॑भिः ।आ या॑हि य॒ज्ञमा॒शुभि॒: शमिद्धि ते॑॥

tūtujāno mahemate'śvebhiḥ pruṣitapsubhiḥ |ā yāhi yajñamāśubhi: śamiddhi te ||

इन्द्र॑ शविष्ठ सत्पते र॒यिं गृ॒णत्सु॑ धारय ।श्रव॑: सू॒रिभ्यो॑ अ॒मृतं॑ वसुत्व॒नम्॥

indra śaviṣṭha satpate rayiṃ gṛṇatsu dhāraya |śrava: sūribhyo amṛtaṃ vasutvanam ||

हवे॑ त्वा॒ सूर॒ उदि॑ते॒ हवे॑ म॒ध्यंदि॑ने दि॒वः ।जु॒षा॒ण इ॑न्द्र॒ सप्ति॑भिर्न॒ आ ग॑हि॥

have tvā sūra udite have madhyaṃdine divaḥ |juṣāṇa indra saptibhirna ā gahi ||

आ तू ग॑हि॒ प्र तु द्र॑व॒ मत्स्वा॑ सु॒तस्य॒ गोम॑तः ।तन्तुं॑ तनुष्व पू॒र्व्यं यथा॑ वि॒दे॥

ā tū gahi pra tu drava matsvā sutasya gomataḥ |tantuṃ tanuṣva pūrvyaṃ yathā vide ||

यच्छ॒क्रासि॑ परा॒वति॒ यद॑र्वा॒वति॑ वृत्रहन् ।यद्वा॑ समु॒द्रे अन्ध॑सोऽवि॒तेद॑सि॥

yacchakrāsi parāvati yadarvāvati vṛtrahan |yadvā samudre andhaso'vitedasi ||

इन्द्रं॑ वर्धन्तु नो॒ गिर॒ इन्द्रं॑ सु॒तास॒ इन्द॑वः ।इन्द्रे॑ ह॒विष्म॑ती॒र्विशो॑ अराणिषुः॥

indraṃ vardhantu no gira indraṃ sutāsa indavaḥ |indre haviṣmatīrviśo arāṇiṣuḥ ||

तमिद्विप्रा॑ अव॒स्यव॑: प्र॒वत्व॑तीभिरू॒तिभि॑: ।इन्द्रं॑ क्षो॒णीर॑वर्धयन्व॒या इ॑व॥

tamidviprā avasyava: pravatvatībhirūtibhi: |indraṃ kṣoṇīravardhayanvayā iva ||

त्रिक॑द्रुकेषु॒ चेत॑नं दे॒वासो॑ य॒ज्ञम॑त्नत ।तमिद्व॑र्धन्तु नो॒ गिर॑: स॒दावृ॑धम्॥

trikadrukeṣu cetanaṃ devāso yajñamatnata |tamidvardhantu no gira: sadāvṛdham ||

स्तो॒ता यत्ते॒ अनु॑व्रत उ॒क्थान्यृ॑तु॒था द॒धे ।शुचि॑: पाव॒क उ॑च्यते॒ सो अद्भु॑तः॥

stotā yatte anuvrata ukthānyṛtuthā dadhe |śuci: pāvaka ucyate so adbhutaḥ ||

तदिद्रु॒द्रस्य॑ चेतति य॒ह्वं प्र॒त्नेषु॒ धाम॑सु ।मनो॒ यत्रा॒ वि तद्द॒धुर्विचे॑तसः॥

tadidrudrasya cetati yahvaṃ pratneṣu dhāmasu |mano yatrā vi taddadhurvicetasaḥ ||

यदि॑ मे स॒ख्यमा॒वर॑ इ॒मस्य॑ पा॒ह्यन्ध॑सः ।येन॒ विश्वा॒ अति॒ द्विषो॒ अता॑रिम॥

yadi me sakhyamāvara imasya pāhyandhasaḥ |yena viśvā ati dviṣo atārima ||

क॒दा त॑ इन्द्र गिर्वणः स्तो॒ता भ॑वाति॒ शंत॑मः ।क॒दा नो॒ गव्ये॒ अश्व्ये॒ वसौ॑ दधः॥

kadā ta indra girvaṇaḥ stotā bhavāti śaṃtamaḥ |kadā no gavye aśvye vasau dadhaḥ ||

उ॒त ते॒ सुष्टु॑ता॒ हरी॒ वृष॑णा वहतो॒ रथ॑म् ।अ॒जु॒र्यस्य॑ म॒दिन्त॑मं॒ यमीम॑हे॥

uta te suṣṭutā harī vṛṣaṇā vahato ratham |ajuryasya madintamaṃ yamīmahe ||

तमी॑महे पुरुष्टु॒तं य॒ह्वं प्र॒त्नाभि॑रू॒तिभि॑: ।नि ब॒र्हिषि॑ प्रि॒ये स॑द॒दध॑ द्वि॒ता॥

tamīmahe puruṣṭutaṃ yahvaṃ pratnābhirūtibhi: |ni barhiṣi priye sadadadha dvitā ||

वर्ध॑स्वा॒ सु पु॑रुष्टुत॒ ऋषि॑ष्टुताभिरू॒तिभि॑: ।धु॒क्षस्व॑ पि॒प्युषी॒मिष॒मवा॑ च नः॥

vardhasvā su puruṣṭuta ṛṣiṣṭutābhirūtibhi: |dhukṣasva pipyuṣīmiṣamavā ca naḥ ||

इन्द्र॒ त्वम॑वि॒तेद॑सी॒त्था स्तु॑व॒तो अ॑द्रिवः ।ऋ॒तादि॑यर्मि ते॒ धियं॑ मनो॒युज॑म्॥

indra tvamavitedasītthā stuvato adrivaḥ |ṛtādiyarmi te dhiyaṃ manoyujam ||

इ॒ह त्या स॑ध॒माद्या॑ युजा॒नः सोम॑पीतये ।हरी॑ इन्द्र प्र॒तद्व॑सू अ॒भि स्व॑र॥

iha tyā sadhamādyā yujānaḥ somapītaye |harī indra pratadvasū abhi svara ||

अ॒भि स्व॑रन्तु॒ ये तव॑ रु॒द्रास॑: सक्षत॒ श्रिय॑म् ।उ॒तो म॒रुत्व॑ती॒र्विशो॑ अ॒भि प्रय॑:॥

abhi svarantu ye tava rudrāsa: sakṣata śriyam |uto marutvatīrviśo abhi praya: ||

इ॒मा अ॑स्य॒ प्रतू॑र्तयः प॒दं जु॑षन्त॒ यद्दि॒वि ।नाभा॑ य॒ज्ञस्य॒ सं द॑धु॒र्यथा॑ वि॒दे॥

imā asya pratūrtayaḥ padaṃ juṣanta yaddivi |nābhā yajñasya saṃ dadhuryathā vide ||

अ॒यं दी॒र्घाय॒ चक्ष॑से॒ प्राचि॑ प्रय॒त्य॑ध्व॒रे ।मिमी॑ते य॒ज्ञमा॑नु॒षग्वि॒चक्ष्य॑॥

ayaṃ dīrghāya cakṣase prāci prayatyadhvare |mimīte yajñamānuṣagvicakṣya ||

वृषा॒यमि॑न्द्र ते॒ रथ॑ उ॒तो ते॒ वृष॑णा॒ हरी॑ ।वृषा॒ त्वं श॑तक्रतो॒ वृषा॒ हव॑:॥

vṛṣāyamindra te ratha uto te vṛṣaṇā harī |vṛṣā tvaṃ śatakrato vṛṣā hava: ||

वृषा॒ ग्रावा॒ वृषा॒ मदो॒ वृषा॒ सोमो॑ अ॒यं सु॒तः ।वृषा॑ य॒ज्ञो यमिन्व॑सि॒ वृषा॒ हव॑:॥

vṛṣā grāvā vṛṣā mado vṛṣā somo ayaṃ sutaḥ |vṛṣā yajño yaminvasi vṛṣā hava: ||

वृषा॑ त्वा॒ वृष॑णं हुवे॒ वज्रि॑ञ्चि॒त्राभि॑रू॒तिभि॑: ।वा॒वन्थ॒ हि प्रति॑ष्टुतिं॒ वृषा॒ हव॑:॥

vṛṣā tvā vṛṣaṇaṃ huve vajriñcitrābhirūtibhi: |vāvantha hi pratiṣṭutiṃ vṛṣā hava: ||