Mandala.Sukta 8.16

इरिम्बिष्ठिः काण्व: । इन्द्र: । गायत्री । · irimbiṣṭhiḥ kāṇva: | indra: | gāyatrī |

प्र स॒म्राजं॑ चर्षणी॒नामिन्द्रं॑ स्तोता॒ नव्यं॑ गी॒र्भिः ।नरं॑ नृ॒षाहं॒ मंहि॑ष्ठम्॥

pra samrājaṃ carṣaṇīnāmindraṃ stotā navyaṃ gīrbhiḥ |naraṃ nṛṣāhaṃ maṃhiṣṭham ||

यस्मि॑न्नु॒क्थानि॒ रण्य॑न्ति॒ विश्वा॑नि च श्रव॒स्या॑ ।अ॒पामवो॒ न स॑मु॒द्रे॥

yasminnukthāni raṇyanti viśvāni ca śravasyā |apāmavo na samudre ||

तं सु॑ष्टु॒त्या वि॑वासे ज्येष्ठ॒राजं॒ भरे॑ कृ॒त्नुम् ।म॒हो वा॒जिनं॑ स॒निभ्य॑:॥

taṃ suṣṭutyā vivāse jyeṣṭharājaṃ bhare kṛtnum |maho vājinaṃ sanibhya: ||

यस्यानू॑ना गभी॒रा मदा॑ उ॒रव॒स्तरु॑त्राः ।ह॒र्षु॒मन्त॒: शूर॑सातौ॥

yasyānūnā gabhīrā madā uravastarutrāḥ |harṣumanta: śūrasātau ||

तमिद्धने॑षु हि॒तेष्व॑धिवा॒काय॑ हवन्ते ।येषा॒मिन्द्र॒स्ते ज॑यन्ति॥

tamiddhaneṣu hiteṣvadhivākāya havante |yeṣāmindraste jayanti ||

तमिच्च्यौ॒त्नैरार्य॑न्ति॒ तं कृ॒तेभि॑श्चर्ष॒णय॑: ।ए॒ष इन्द्रो॑ वरिव॒स्कृत्॥

tamiccyautnairāryanti taṃ kṛtebhiścarṣaṇaya: |eṣa indro varivaskṛt ||

इन्द्रो॑ ब्र॒ह्मेन्द्र॒ ऋषि॒रिन्द्र॑: पु॒रू पु॑रुहू॒तः ।म॒हान्म॒हीभि॒: शची॑भिः॥

indro brahmendra ṛṣirindra: purū puruhūtaḥ |mahānmahībhi: śacībhiḥ ||

स स्तोम्य॒: स हव्य॑: स॒त्यः सत्वा॑ तुविकू॒र्मिः ।एक॑श्चि॒त्सन्न॒भिभू॑तिः॥

sa stomya: sa havya: satyaḥ satvā tuvikūrmiḥ |ekaścitsannabhibhūtiḥ ||

तम॒र्केभि॒स्तं साम॑भि॒स्तं गा॑य॒त्रैश्च॑र्ष॒णय॑: ।इन्द्रं॑ वर्धन्ति क्षि॒तय॑:॥

tamarkebhistaṃ sāmabhistaṃ gāyatraiścarṣaṇaya: |indraṃ vardhanti kṣitaya: ||

प्र॒णे॒तारं॒ वस्यो॒ अच्छा॒ कर्ता॑रं॒ ज्योति॑: स॒मत्सु॑ ।सा॒स॒ह्वांसं॑ यु॒धामित्रा॑न्॥

praṇetāraṃ vasyo acchā kartāraṃ jyoti: samatsu |sāsahvāṃsaṃ yudhāmitrān ||

स न॒: पप्रि॑: पारयाति स्व॒स्ति ना॒वा पु॑रुहू॒तः ।इन्द्रो॒ विश्वा॒ अति॒ द्विष॑:॥

sa na: papri: pārayāti svasti nāvā puruhūtaḥ |indro viśvā ati dviṣa: ||

स त्वं न॑ इन्द्र॒ वाजे॑भिर्दश॒स्या च॑ गातु॒या च॑ ।अच्छा॑ च नः सु॒म्नं ने॑षि॥

sa tvaṃ na indra vājebhirdaśasyā ca gātuyā ca |acchā ca naḥ sumnaṃ neṣi ||