Mandala.Sukta 8.36
Rigveda · 7 verses
- 8.36.1
श्यावाश्व आत्रेय: । इन्द्र: । शक्वरी, ७ महापंक्ति: । · śyāvāśva ātreya: | indra: | śakvarī, 7 mahāpaṃkti: |
अ॒वि॒तासि॑ सुन्व॒तो वृ॒क्तब॑र्हिष॒: पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
avitāsi sunvato vṛktabarhiṣa: pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.2
प्राव॑ स्तो॒तारं॑ मघव॒न्नव॒ त्वां पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
prāva stotāraṃ maghavannava tvāṃ pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.3
ऊ॒र्जा दे॒वाँ अव॒स्योज॑सा॒ त्वां पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
ūrjā devām̐ avasyojasā tvāṃ pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.4
ज॒नि॒ता दि॒वो ज॑नि॒ता पृ॑थि॒व्याः पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
janitā divo janitā pṛthivyāḥ pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.5
ज॒नि॒ताश्वा॑नां जनि॒ता गवा॑मसि॒ पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
janitāśvānāṃ janitā gavāmasi pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.6
अत्री॑णां॒ स्तोम॑मद्रिवो म॒हस्कृ॑धि॒ पिबा॒ सोमं॒ मदा॑य॒ कं श॑तक्रतो ।यं ते॑ भा॒गमधा॑रय॒न्विश्वा॑: सेहा॒नः पृत॑ना उ॒रु ज्रय॒: सम॑प्सु॒जिन्म॒रुत्वाँ॑ इन्द्र सत्पते॥
atrīṇāṃ stomamadrivo mahaskṛdhi pibā somaṃ madāya kaṃ śatakrato |yaṃ te bhāgamadhārayanviśvā: sehānaḥ pṛtanā uru jraya: samapsujinmarutvām̐ indra satpate ||
- 8.36.7
श्या॒वाश्व॑स्य सुन्व॒तस्तथा॑ शृणु॒ यथाशृ॑णो॒रत्रे॒: कर्मा॑णि कृण्व॒तः ।प्र त्र॒सद॑स्युमाविथ॒ त्वमेक॒ इन्नृ॒षाह्य॒ इन्द्र॒ ब्रह्मा॑णि व॒र्धय॑न्॥
śyāvāśvasya sunvatastathā śṛṇu yathāśṛṇoratre: karmāṇi kṛṇvataḥ |pra trasadasyumāvitha tvameka innṛṣāhya indra brahmāṇi vardhayan ||