Mandala.Sukta 8.57

मेध्य: काण्व:। अश्विनौ । त्रिष्टुप् । · medhya: kāṇva: | aśvinau | triṣṭup |

यु॒वं दे॑वा॒ क्रतु॑ना पू॒र्व्येण॑ यु॒क्ता रथे॑न तवि॒षं य॑जत्रा ।आग॑च्छतं नासत्या॒ शची॑भिरि॒दं तृ॒तीयं॒ सव॑नं पिबाथः॥

yuvaṃ devā kratunā pūrvyeṇa yuktā rathena taviṣaṃ yajatrā |āgacchataṃ nāsatyā śacībhiridaṃ tṛtīyaṃ savanaṃ pibāthaḥ ||

यु॒वां दे॒वास्त्रय॑ एकाद॒शास॑: स॒त्याः स॒त्यस्य॑ ददृशे पु॒रस्ता॑त् ।अ॒स्माकं॑ य॒ज्ञं सव॑नं जुषा॒णा पा॒तं सोम॑मश्विना॒ दीद्य॑ग्नी॥

yuvāṃ devāstraya ekādaśāsa: satyāḥ satyasya dadṛśe purastāt |asmākaṃ yajñaṃ savanaṃ juṣāṇā pātaṃ somamaśvinā dīdyagnī ||

प॒नाय्यं॒ तद॑श्विना कृ॒तं वां॑ वृष॒भो दि॒वो रज॑सः पृथि॒व्याः ।स॒हस्रं॒ शंसा॑ उ॒त ये गवि॑ष्टौ॒ सर्वाँ॒ इत्ताँ उप॑ याता॒ पिब॑ध्यै॥

panāyyaṃ tadaśvinā kṛtaṃ vāṃ vṛṣabho divo rajasaḥ pṛthivyāḥ |sahasraṃ śaṃsā uta ye gaviṣṭau sarvām̐ ittām̐ upa yātā pibadhyai ||

अ॒यं वां॑ भा॒गो निहि॑तो यजत्रे॒मा गिरो॑ नास॒त्योप॑ यातम् ।पिब॑तं॒ सोमं॒ मधु॑मन्तम॒स्मे प्र दा॒श्वांस॑मवतं॒ शची॑भिः॥

ayaṃ vāṃ bhāgo nihito yajatremā giro nāsatyopa yātam |pibataṃ somaṃ madhumantamasme pra dāśvāṃsamavataṃ śacībhiḥ ||